Governu ofisialmente lansa projetu estrada Urbana Glenu no Glenu–Letefoho

ERMERA, 26 Janeiru 2026 (TATOLI) – Governu Timor-Leste ofisialmente lansa projetu konstrusaun Estrada Urbana Glenu no Estrada Glenu–Letefoho, iha serimónia asinatura kontratu ne’ebé halao iha EBC Eraulu, Postu Letefoho, Munisípiu Ermera, Segunda (26/01/2026).

Asinatura kontratu ne’e envolve Ministru Obras Públika (MOP), Samuel Marçal, ho kompania konstrutora sira, ho sasin hosi Primeiru Ministru (PM), Kay Rala Xanana Gusmão, Reprezentante Banku Mundíal, David Freedman, Prezidente Autoridade Munisípiu Ermera, José Martinho dos Santos, inklui komunidade lokal sira.

Projetu estrada ne’e kobre dalan husi Letefoho (km 30+230) to’o Gleno (km 54+370), ho numeru kontratu TENDER/191/MOP–2024, sei halo konstrusaun durante loron 365 ho orsamentu $38,800,054.00, ne’ebé implementa husi China Civil Engineering Construction Corporation (China).

Alende ne’e, projetu Estrada Urbana Glenu no sistema drainajen mos sei konstrui ho pakote rua ho durasaun tinan ida. Pakote 1 ho orsamentu $2,640,762.21 no pakote 2 ho orsamentu $3,214,929.67, ne’ebé sei implementa husi kompania Shabryca Construction UNIP. LDA.

Prezidente Autoridade Munisípiu Ermera (PAM), José Martinho dos Santos, agradese ba parte hotu ne’ebé halo esforsu husi tinan naruk to’o hetan momentu asinatura kontratu no lansamentu primeira pedra. Nia hateten katak governu kompriende duni susar komunidade sira no kontinua komprometidu atu konstrui estrada ne’ebé di’ak, ne’ebé sei fó benefísiu boot ba povu Ermera.

“Projetu ida ne’e Estrada Glenu–Letefoho, maibé mos Estrada Urbana Glenu, inklui merkadu munisípal, no planeamentu ba infraestrutura sira seluk ne’e sei fó benefísiu ba ema hamutuk rihun 554 husi postu administrativu haat,” hateten PAM Ermera iha nia diskursu, Segunda ne’e.

Parte seluk, Ministru Obras Públika, Samuel Marçal esplika prosesu projetu ida ne’e laos lalais, tanba tenke tuir estudu tékniku, dezenhu, lei, no prosedimentu aprovisionamentu ne’ebé loos. Nia hateten katak prioridade governu mak estrada rural no estrada Ermera, maibé tenke halo ho kuidadu atu garante kualidade konstrusaun no integridade prosesu.

“Governu hakarak lalais, maibé tenke tuir lei, regras, no prosesu. Ita la bele halo hotu kedas. Ita lao neneik, maibé ho seguransa, ho kualidade, no ho responsabilidade,” hateten Samuel Marçal.

Nia mos agradese ba Banku Mundíal, deputadu sira, tekniku sira, no komunidade Ermera ba pasiénsia no apoiu ne’ebé fó durante prosesu tomak.

Ministru Marçal mos hateten katak kontratu ne’e ho durasaun tinan ida resin, no karik iha apoiu komunidade tomak, iha tinan 2027 estrada ne’e bele konklui.

“Estrada laos de’it dalan, maibé sei hamoris ekonomia, halo sasan sai baratu, fasilita saúde, edukasaun, turizmu, no dezenvolvimentu lokal,” nia hateten.

Nune’e mos Reprezentante Banku Mundíal, David Freedman, hateten katak projetu Estrada Glenu–Letefoho tama iha pakote finansiamentu husi Banku Mundíal ho montante to’o miliaun US$59, liu husi akordu finansiamentu entre Governu Timor-Leste, reprezenta husi Ministériu Finansas (MF), MOP no Banku Mundíal.

“Prosesu aprovisionamentu ne’e kompleksu, maibé akompaña direta husi peritu no enjenéiru sira hodi garante kualidade, transparénsia no integridade husi prosesu tomak,” Nia deklara.

Serimónia lansamentu projetu ne’e marka hanesan pasu importante ba dezenvolvimentu infraestrutura iha Munisípiu Ermera, ne’ebé sei fó impaktu boot ba mobilidade, ekonomia lokal, no moris-di’ak komunidade sira.

Jornalista : Cidalia Fátima

Editora    : Armandina Moniz