DILI, 26 Janeiru 2026 (TATOLI)—Klube Boxe no membru Asosiasaun Boxista, Segunda ne’e, entrega pedidu ba Ministériu Juventude, Desportu, Arte no Kultura (MJDAK) hodi husu solusaun ligadu ho planu realizasaun kongresu estraordináriu iha Federasaun Boxe Amadora Timor-Leste (FBATL).
Protavóz no atuál Treinador Klube El Matadór, Abílio Orlando dos Santos esplika maioria klube no Asosiasaun Boxista sira lamenta ho funsionamentu atividade iha Federasaun Boxe Amadora Timor-Leste (FBATL) liuliu ligadu ho funsionamentu estrutura hafoin falesimentu Prezidente Januario Brites iha tinan 2024.
“Estatutu hateten bainhira prezidente lakon vida, membru asembleia tenke konvoka reuniaun hodi halo kongresu estraordináriu maibé realidade to’o agora seidauk realiza,” Orlando dos Santos hateten iha edifísiu MJDAK, Lesidere, Dili.
Iha fatin hanesan, Vise Prezidente Asembleia Jerál FBTL, Mário da Conceição hateten, Ministru Juventude Desportu Arte no Kultura, Nelyo Isaac Sarmento orienta ona atu tempu besik halo reuniaun estraordináriu hodi deside kalendáriu kongresu ho objetivu salva futuru boxista iha Timor-Leste.
“Ami entrega ona karta ba ministru kona-ba realiza kongresu iha tempu badak,” Mario argumenta.
Entretantu, klube no membru asosiasaun hamutuk 18 mak hato’o pedidu ba MJDAK ho ezijénsia haat hanesan FBATL laiha atividade no relatóriu hafoin lakon prezidente iha 2024, deskonfia mosu mál administrasaun no komete infrasaun husi pesóal membru ezekutivu, durante atividade kompetisaun iha rai-li’ur deskonfia atleta ne’ebé partisipa la liuhusi selesaun no husu Governu atu solusiona liuhusi kongresu estraordináriu.
Jornalista: Natalino Belo
Editór: Xisto Freitas da Piedade
