DILI, 26 Janeiru 2026 (TATOLI) – Ministériu Agrikultura, Pekuária, Peska no Floresta (MAPPF), liuhusi Sekretaria Estadu Peska konstrui, iha tinan kotuk, minimerkadu ba fa’an ikan iha Kaitehu, munisípiu Likisá, hodi akumula vendedór sira ne’ebé fa’an iha dalan-ninin sira.
Sekretáriu Estadu Peska, Domingos dos Santos, hateten minimerkadu ne’e harii atu apoia atividade negosiante sira iha dalan-ninin, ne’ebé fa’an ikan laiha ijiene tanba kontamina ho rai-rahun no lalar sira.
Minimerkadu ne’e kompleta ho instalasaun sira hanesan sintina ka hariis-fatin, bee-torneira, fatin fa’an nian, iha mós makina prodús jelu ba konserva ikan no iha mós cooler box no frizer.
“Ita iha minimerkadu iha Taibesi no Manleuana, maibé ninia utilizasaun ne’e la másimu, nune’e harii foun ida iha Kaitehu, entrega ona ba Autoridade Munisípiu Likisá hodi mobiliza ita-nia vendedór ikan sira parte ne’ebá nian konsentra hotu iha ne’ebá”, Domingos dos Santos dehan ba Tatoli, iha Komoro, Dili.
Orsamentu ne’ebé prevee hodi harii minimerkadu ne’e hamutuk rihun $50 no ministériu entrega ba autoridade Likisá iha Dezembru 2025.
Relasiona ho minimerkadu iha Taibesi no Manleuana ne’e rasik ministériu kompleta ona mákina prodús jelu nian, maibé vendedór sira la utiliza no hakarak fa’an iha tasi-ibun sira. Aleinde ne’e, husu tan ba Governu atu harii minimerkadu ba ikan nian iha tasi-ibun.
Ministériu nafatin halo esforsu másimu, nune’e vendedór ikan sira iha Dili bele fa’an hotu iha merkadu sira.
Jornalista: Arminda Fonseca
Editora: Maria Auxiliadora
