DILI, 26 Janeiru 2026 (TATOLI)—Ministériu Ensinu Superiór, Siénsia no Kultura (MESSK) liuhusi Diresaun Jerál hamutuk ho DANAPURI Malázia, Segunda ne’e, asina akordu kona-ba kooperasaun téknika hodi utiliza plataforma Vamos iha Institutu Ensinu Superiór (IES).
Objetivu husi akordu ida-ne’e inisiativa maihusi Vise Primeiru-Ministru, Ministru Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino, ho DANAPURI hodi kapasita di’ak liután joven sira, liu-liu sira-nia estudu iha universidade sira.
“Importánsia husi akordu ida-ne’e ita haree liubá parte téknika hodibele implementa ho efetivu liu iha sistema dijitalizasaun Timor-Leste. Tanba tempu dijitalizasaun iha universidade barak no estudante barak mak utiliza sasán sira-ne’e ba rejistu online,” Diretór Jerál MESSK, Domingos Barros dehan ba jornalista sira iha salaun MESSK, Kolmera.
Dirijente ne’e hatutan programa Vamos importante tebes ba planu rejistu estudante no nia implementasaun sira.
“Planu bá-oin ami sei hahú husi universidade sira, oinsá atu kria ekipa ida atu halo avaliasaun depoiz bele implementa iha universidade sira. Klaru katak bainhira planu sira-ne’e tama hotu ona, maibé ita sei iha formasaun balun kona-ba plataforma ida-ne’e ba estudante sira,” nia subliña.
Nia esplika sira (DANAPURI) iha kompromisu katak la’ós estabelese MoU de’it, maibé sira hakarak implementa, tanba ne’e sira-nia ekipa sei mai hamutuk ho ministériu ba vizita universidade sira atu rona sira-nia planu atu implementa tuir.
“Ha’u hanoin parte rua iha hanoin hamutuk hakarak eleva instituisaun nia kualidade tenke aposta ba programa dijitalizasaun. Tanba ita iha era ida-ne’ebé kompetitivu, ida-ne’e importante,” nia katak.
Iha fatin hanesan, Managing Director DANAPURl, Bahjat Aman, hateten liuhosi asina MoU bele korresponde abilidade estudante sira-nian.
“Ami kria buat ida-ne’ebé úniku tebes ba universidade, iha-ne’ebé ami hakarak fó ba graduadu sira hotu, estudante sira ho oportunidade serbisu nian. Ami introdús hela plataforma dijitál ida. Ida-ne’e hanesan servisu merkadu nian ne’ebé sei korresponde ho abilidade sira husi estudante sira. Pur-ezemplu, se sira iha eletrisidade bele halo serbisu eletrisidade nian, mekániku no seluk tan. Nune’e, ita realiza hodi juventude bele utiliza,” Bahjat Aman esplika.
Aman akresenta programa Vamos ne’e foka ba MESSK atu asegura oportunidade servisu nian, nune’e graduadu no estudante sira bele servisu loloos iha futuru.
DANAPURI hanesan empreza teknolojia iha Malázia
DANAPURI Sdn Bhd mak empreza teknolojia ida-ne’ebé nia baze iha Malázia, ne’ebé espesializa ba Governu eletróniku nian, sistema identidade no seguransa fronteira nian, ne’ebé serve hanesan parseiru xave ba ajénsia Governu nian.
DANAPURI fasilita servisu dijitál, seguru no efisiente ba sidadaun sira no Governu, ho projetu xave sira inklui autentikasaun produtu, kredensiál dijitál sira no seguransa fronteira nian.
Aleinde Malázia, DANAPURI serbisu ona iha projetu sira iha Repúblika Guiné no Repúblika Populár Bangladexe, ne’ebé foku ba teknolojia hanesan teknolojia biométriku, identidade dijitál, no jestaun dadus ne’ebé seguru.
Jornalista: Osória Marques
Editór: Xisto Freitas da Piedade
