MOP prepara ona kontratu projetu estrada urbana Baukau – Ainaru – Aileu
EREMERA, 26 Janeiru 2026 (TATOLI)— Ministeriu Obras Públika (MOP) dadaun ne’e prepara ona konstratu ba projetu Estrada urbana iha munisípiu tolu hanesan Baukau, Ainaru no Aileu.
Ministru MOP, Samuel Marçal hato’o informasaun ne’e hafoin halo lansamentu ba Projetu Estrada Urbana Glenu iha EBC Eraulu, Munisípiu Ermera, Segunda ne’e.
“Kontratu hein Primeiru Ministru nia kalendariu atu iha dia 29 ou 30 atu asina tan kontratu projetu estrada urbana ba Baukau, Ainaru no Aileu, seluk sei prosesu hela iha aprovisionamentu,” Ministru Marçal hatete.
Nia espera servisu ba projetu Estrada sira ba aselera maibé dadauk ne’e Governu iha setór infraestutura hakarak hadia mós nesesidade sira seluk hanesan irigasaun, eskola no saúde.
“Iha program barak ne’ebé Governu iha prosesu hela no sira mos iha limitasaun rekursu laos deit buat ne’e ita foti hodi halo deit, osan ne’e povu nian, povu mak hola ho ran no ruin, halo buat ida tenke ho durasaun naruk labele ho fulan ha’at ou lima naksobu fila fali,” Nia esplika.
Tuir Governante ne’e, projetu saida deit ne’ebé atu realiza tenke ho kualidade no iha durasaun naruk nune’e Banku Mundial ou parseiru sira ne’ebé hakarak apoiu bele iha garantia nune’e mós povu ne’ebé sai benefisiariu bele sente kontente.
Kona-ba progresu dezenvolvimentu iha ámbitu estrada rurál, husi projetu 260 ne’ebé prevee ona, projetu 45 mak konklui ona no 215 marka ona ba tinan 2026.
Kona-ba estrada urbana, nasionál no munisipál, finaliza ona projetu 27 no projetu 60 seluk neʼebé prevee ona atu implementa iha tinan 2026.
Entretantu, kona-ba ponte husi projetu 17 neʼebé planeia ona ne’e, projetu ida (1) ramata iha 2025 no projetu 12 mak ajenda ona ba ezekusaun iha 2026.
Jornalista : Cidalia Fátima
Editor : Armandina Moniz
