VIKEKE, 26 Janeiru 2026 (TATOLI)—Populasaun husi Aldeia Loko-Loko, Suku Matahoi, Postu Administrativu Uatulari, Munisípiu Vikeke, ejize Eletrisidade de Timor-Leste Empreza Públika, (EDTL, E.P.) konklui obra Projetu Komunitáriu Eletrisidade (PKE) ne’ebé implementa iha Suku Matahoi.
Portavóz Komunidade Loko-Loko, Luís Miguel haktuir obra PKE ne’e implementa iha VIII Governu iha tinan 2023 ne’ebé distribui poste (ai-riin eletrisidade) hamutuk 54 bá iha Aldeia Loko-Loko nune’e populasaun hamutuk ho tékniku EDTL Postu Uartulari harii hotu poste hirak-ne’e, depoiz Nonu Governu hatutan distribui tan postu hamutuk 213, maibé atu tinan rua ona seidauk dada liña eletrisidade bá populasaun hodi asesu.
“Tanba ne’e, ami povu Loko-Loko hakarak ejize ba Governu liuhusi EDTL aselera obra PKE ne’ebé implementa iha Aldeia Loko-Loko, atu ami bele asesu ba eletrisidade tanba kuaze tinan naruk ami povu Loko-Loko seidauk asesu ba naroman,” Luís Miguel ba jornalista sira liuhusi konferénsia ba imprensa iha Aldeia Loko-Loko, Segunda ne’e.
Nia afirma bainhira EDTL la aselera obra PKE ne’e, populasaun sei kontinua organiza malu hodi ejize Governu.
Iha fatin hanesan, reprezenta populasaun Aldeia Loko-Loko, Agostinho do Rosário informa implementasaun obra PKE iha Aldeia Loko-Loko populasaun oferese plantasaun gratuita no populasaun mak selu karreta hodi tula ai-riin hodi harii tuir dalan iha área Loko-Loko laran.
“Ami rasik mak ke’e poste nia fatin ho harii poste, maibé kuaze tinan rua ona seidauk dada liña eletrisidade ba ami. Daudaun ne’e, ami haree EDTL abandona tiha servisu, nune’e ami Loko-Loko prefere Governu aselera lalais,” nia subliña.
Aleinde ne’e, Xefe Suku Matahoi, António Amaral haktuir kona-ba preokupasaun husi populasaun Aldeia Loko-Loko nian ba eletrisidade, nu’udár autoridade lokál hato’o beibeik preokupasaun ne’e ba EDTL munisípiu más seidauk rezolve.
“Nune’e, ha’u husu ba EDTL dada ona fiu eletrisidade ba poluasaun Loko-Loko nian. Karik liu semana ida ami sei lori karta ba nasionál tanba obra PKE tinan rua ona no populasaun mak halo servisu voluntáriu,” nia realsa.
Tuir dadus, populasaun husi Aldeia Loko-Loko totál hamutuk na’in-126 no uma-kain hamutuk 64.
Jornalista: Vitorino Lopes da Costa
Editór: Xisto Freitas da Piedade
