DILI, 27 Janeiru 2026 (TATOLI)—Diretór Ezekutivu Ajénsia Nasionál Avaliasaun Akreditasaun Akadémika (ANAAA), Nilton Paiva, dehan ANAAA akredita ona kursu desportu iha Uuniversidade Nasionál Timor Lorosa’e (UNTL), maibé atu transforma ba lisensiatura ne’e kompeténsia estrutura UNTL nian.
“Loos duni. Departamentu Desportu ho Diploma III ne’ebé ita halo ona akreditasaun ba maibé kona-ba atu transforma ba lisensiatura ne’e kompeténsia UNTL nian. ANAAA nia papél no responsabilidade importante mak halo avaliasaun no akreditasaun,” Paiva dehan ba TATOLI iha nia kna’ar fatin, Balide, Dili, Tersa ne’e.
Kona-ba fasilidade hanesan saladeaula ida de’it, nia dehan, dahuluk sira-nia kursu la pasa tanba fasilidade menus inklui rekursu umanu (dosente). Departamentu Desportu hetan akreditasaun ne’e UNTL hatama karta iha daruak nian.
Notísia relevante: UNTL mak bele deside Departamentu Desportu transforma ba lisensiatura
Entretantu, Paiva haktuir, hosi inísiu 2010 to’o agora kursu sira-ne’ebé eziste iha Institutu Ensinu Superiór ne’e tama ba siklu datoluk no balun atu tama ona ba siklu dahaat.
“Ne’ebé, ami haree data kuandu IES atu reakredita, ami haruka karta ba IES,” nia informa.
Nia esplika halo akreditasaun bazeia ba padraun sanulu (10) hanesan vizaun, misaun, kurríkulu, learning outcome, kursu, estudante alumni, rekursu umanu (dosente), fasilidade, infraestrutura no finansa.
“Tinan ne’e ita hakerek karta ba instituisaun lima no programa 24 atu hetan akreditasaun ba siklu datoluk no dahaat.
ANAAA nia orsamentu ba tinan ne’e hamutuk rihun $621 hodi responde ba programa akreditasaun nian iha institutu ensinu superiór sira.
Jornalista: Osória Marques
Editór: Xisto Freitas da Piedade
