DILI, 27 Janeiru 2026 (TATOLI)—Autoridade Munisipál Baukau (AMB) liuhusi ekipa konjunta lideradu husi Sekretáriu Munisipál Asuntu Planeamentu Investimentu no Dezenvolvimentu (PIDI), Tersa ne’e, muda ona negosiante ne’ebé hala’o atividade negósiu iha arredór resintu sede Suku Bahú Vila Antiga, Postu Administrativu Baukau Vila.
AMB deside hasai baraka referida hafoin negosiante utiliza iha loron Domingu (25/01/2026). Autoridade konsidera fatin ne’e nu’udár espasu públiku no sede suku nu’udár fatin hala’o atendimentu ba komunidade husi área Suku Bahú. Tan ne’e, muda ona ba merkadu Tuanau, Vila Nova iha-ne’ebé antes ne’e prepara ona hodi hala’o atividade negósiu.
“Negosiante sira okupa fali espasu públiku iha sede suku nian. Ida-ne’e labele. Sede Suku atu halo atendimentu ba populasaun, la’ós arredór sai fali fatin ba komersializasaun,” Xefe ekipa konjunta atuál Sekretáriu Munisipál Baukau Asuntu PIDI, Eduardo Filipe Ximenes hateten iha Vila Antiga, Baukau, Tersa ne’e.
Eduardo relata negosiante hirak-ne’e antes hala’o atividade ekonomia iha eis merkadu Vila Antiga ne’ebé AMB deside ona atu transfere ba merkadu foun tanba eis merkadu Vila Antiga futuru atu konstrui jardín maibé maioria deside hala’o fali atividade iha arredór sede suku ne’ebé prejudika atendimentu publiku.
Nia hateten negosiante husi Vila Antiga aprezenta razaun lakohi ba merkadu Tuanau tanba kolokadu iha kotuk, mezmu nune’e AMB konsidera negosiante hotu iha moru laran, laiha diskriminasaun.
“Maioria ema iha-ne’ebá seguru. Kuaze tinan ida ho balun ona la seguru oinsá? Bee iha, eletrisidade iha, dalan no morru iha,” Eduardo haktuir.
AMB kontinua rejista preokupasaun husi negosiante sira no nafatin kompleta fasilidade iha merkadu Tuanau maibé husu negosiante sira husi Vila Antiga atu koopera tanba parte jestaun merkadu nafatin aterru mós fatin ba sira, nune’e tempu ona atu muda negosiante husi Vila Antiga inklui laiha razaun ba negosiante sira atu okupa resintu Sede Suku Bahú nian ba fatin negósiu.
Entretantu, tuir dadus, totál negosiante iha Munisípiu Baukau hamutuk 879 iha-ne’ebé husi eis merkadu Vila Antiga hamutuk 56 ho tipu negósiu ne’ebé muda bá merkadu Tuanau hamutuk 21.
Jornalista: Natalino Belo
Editór: Xisto Freitas da Piedade
