DILI, 27 Janeiru 2026 (TATOLI)—Governu liuhusi reuniaun Konsellu Ministru aprova projetu Dekretu-Lei ne’ebé ho objetivu atu estabelese Rejime Konsesaun Subvensaun Públika husi Gabinete Apoiu ba Sosiedade Sivíl (GASC, sigla lian portugés) kona-ba subsídiu, subvensaun no doasaun públika.
Proposta ne’e aprezenta husi Vise-Primeiru-Ministru no Ministru Koordenadór Asuntu Sosiál, Mariano Assanami Sabino, no husi Koordenadór GASC, Joaquim Freitas, iha reuniaun Konsellu Ministru ne’ebé hala’o iha Palásiu Governu, tersa ne’e.
Diploma ne’e define regra, kritériu no prosedimentu aplikavel sira atu fó apoiu finanseiru públiku ba organizasaun sosiedade sivíl sira-ne’ebé dezenvolve atividade ho interese públiku iha área sosiál, edukativu, kulturál, relijiozu ka komunitáriu, tuir Dekretu-Lei nú. 39/2024, 27 Novembru, ne’ebé aprova regulamentu kona-ba subsídiu, subvensaun no doassaun públika.
Rejime foun ne’e ho objetivu atu reforsa transparénsia, ekuidade no efisiénsia iha konsesaun subvensaun, hodi promove papél organizasaun sosiedade sivíl hanesan parseria estratéjika Estadu nian iha implementasaun polítika públika no promosaun justisa sosiál, pás, governasaun di’ak no dezenvolvimentu sustentavel.
Aleinde diploma ne’e estabelese mós katak subvensaun bele apoia projetu no inisiativa sira iha área edukasaun, saúde, formasaun profisionál, kultura, inkluzaun sosiál, direitu umanu no kooperasaun entre organizasaun sosiedade sivíl nasionál no estranjeira, liuliu país sira CPLP no ASEAN nian.
Jornalista : Alexandra da Costa
Editór : Cancio Ximenes
