DILI, 27 Janeiru 2026 (TATOLI)–Konsellu Ministru, tersa ne’e, aprova proposta-lei rua ne’ebé aprezenta husi Ministra Finansa, Santina Cardoso, ho objetivu atu halo alterasaun dahuluk ba Lei nú. 13/2011, 28 Setembru, ne’ebé estabelese kona-ba rejime dívida públika no atu kria rejime jerál ba taxa administrativa.
Relasiona ho proposta-lei ne’ebé halo alterasaun dahuluk ba lei nú. 13/2011, 28 Setembru, rejime dívida públika, diploma ne’e ho objetivu atu adapta enkuadramentu legál dívida públika nian ba nesesidade atu diversifika fonte finansiamentu ba Orsamentu Jerál Estadu nian, hodi hamenus dependénsia maka’as ba Fundu Petrolíferu.
Tanba ne’e, proposta ne’e permite atu habelar ámbitu husi emisaun dívida públika, hodi la limita de’it ba finansiamentu infraestruturas estratéjika, atu nune’e bele permite utilizasaun instrumentu sira hanesan títulu Tezouru hodi finansia despeza jerál Estadu nian.
Alterasaun ida-ne’e ho objetivu atu aliña rejime nasionál ba dívida públika ho prátika sira-ne’ebé país maiória utiliza no kria kondisaun ba jestaun ida-ne’ebé sustentavel liu ba finansas públika iha tempu médiu no tempu naruk.
Ho inisiativa ida-ne’e, Governu iha intensaun atu hametin sustentabilidade orsamentál, prepara país ba diminuisaun progresiva reseita husi Fundu Petrolíferu no asegura estabilidade ne’ebé boot liu iha finansiamentu polítika públika ne’ebé esensiál.
Enkuantu kona-ba proposta-lei seluk ne’ebé ho objetivu atu estabelese rejime jerál ba taxa administrativa, diploma ne’e ninia objetivu mak atu define kuadru legál ida-ne’ebé uniforme ba kriasaun, insidénsia, likidasaun, kobransa no atualizasaun ba taxa ne’ebé administrasaun públika kobra, hodi asegura transparénsia, previzibilidade no rigor ne’ebé boot liu iha ninia aplikasaun.
Inisiativa ne’e mós ho objetivu atu hametin prinsípiu legalidade, hodi garante katak taxa ne’e korresponde ho efetivu ba kustu husi servisu ne’ebé presta ona ka benefísiu ne’ebé hetan husi indivídu sira.
Proposta ne’e klarifika prinsípiu ne’ebé aplikavel ba kriasaun taxa, hodi determina katak taxa ne’e tenke estabelese husi dekretu-lei, bazeia-ba estudu ekonómiku no finanseiru ne’ebé loloos, no respeita ba kritériu proporsionalidade no ekivalénsia ekonómika.
Diploma-ne’e regula mós insidénsia objetiva no subjetiva husi taxa, faktu ne’ebé hamosu obrigasaun pagamentu, nune’e mós rejime ba redusaun no izensaun liuliu iha situasaun insufisiénsia ekonómika ne’ebé komprovadu ka tanba razaun interese públiku nian.
Jornalista : Alexandra da Costa
Editór : Cancio Ximenes
