DILI, 27 Janeiru 2026 (TATOLI)—Diretór Ajénsia Dezenvolvimentu Timor-Leste ka East Timor Development Agency (ETDA), Januario Neto Mok, hateten informasaun ne’ebé fó sai husi fonte anonímu ne’e falsu ka Hoax tanba sira seidauk fó sai informasaun ida-ne’e iha sira-nia pájina ofisiál, nune’e konsidera la loos tanba sira fasilita de’it formasaun ho área oioin ba joven sira.
“Informasaun ida-ne’e la’ós ETDA mak publika. Dalaruma estudante balun ne’ebé tuir formasaun iha ne’e mak publika, maibé atu dehan de’it katak ETDA hanesan sentru formasaun ida-ne’ebé fasilita no prepara juventude sira-nia kapasidade hodi bele kria kampu traballu ba sira-nia an rasik iha rai-li’ur no mós iha rai-laran,” Diretór Ajénsia Dezenvolvimentu Timor-Leste kaEast Timor Development Agency (ETDA), Januario Neto Mok, hateten ba Agência Tatoli iha nia kna’ar fatin, Fatuhada, ohin.
ETDA hakbi’it joven sira hodi halo preparasaun ba servisu liuhusi lian, administrasaun finansa, ospitalidade, turizmu, agrikultura, no husi formasaun sira-ne’e hotu iha oportunidade ba servisu iha rai-li’ur hanesan iha Portugál, Autrália, Nova Zelándia no seluk tan.
“Tanba ne’e ami presiza ema atu mai kursu para tama iha pool kursu tanba daudaun ne’e pool mamuk ona, entaun ami treinu fila-fali sira atu bainhira instituisaun ka ajénsia ruma husu ami bele rekomenda ba de’it,” nia hateten.
Bainhira empreza sira iha rai-li’ur presiza timoroan balun atu ba servisu iha sira-nia fatin, entaun ETDA sei rekomenda formandu sira-ne’e mak ba servisu iha sira-nia empreza.
Hanesan tinan kotuk, nia dehan, iha área ospitalidade nian hamutuk ema na’in-300 mak hetan ona servisu iha rai-laran no rai-li’ur ho 30%, no dalaruma estudante sira-ne’e ba aplika direta vaga iha SEFOPE no mós sira ba rasik liuhusi Agéncia balun ne’ebé fasilita sira ba.
“Tanba ami fasilita de’it formasaun ba sira no resposta rekomendasaun husi parséria sira. Enkuantu kona-ba preparasaun dokumentu bazeia estudante sira na’in rasik prepara no ba servisu iha rai-li’ur depende sira mak hakarak servisu to’o tinan naruk nia laran ne’e sira-nia direitu ona, ne’e la’ós sistema ida ami atu kontrola. Tanba ami garante atu sira bele buka sira-nia moris hodi ajuda família,” nia esplika.
Aleinde ne’e, ETDA mós lahalo monitorizasaun ba estudante hira mak servisu ona bainhira ramata husi ETDA, karik sira halo monitorizadaun normalmente sira sei hatene serteza númeru empregu nian, tanba sira-nia kuantidade pool ba estudante sira hamutuk 360.
“Maibé, kuantidade pool ne’e mamuk ona tanba parséria sira husu hotu ona estudante sira atu ba servisu iha sira-nia fatin. Iha fulan ida-ne’e nia laran, ami sei haruka timoroan na’in-50 ba servisu iha Portugál iha área agrikultura hodi packing aifuan no balun ba servisu hodi hein ferik katuas sira,” nia dehan.
Entretantu, totál kliente sira-ne’ebé tuir ona formasaun iha ETDA hamutuk 30.000 ne’e mesak joven, ferik-katuas no mós funsionáriu sira.
Tuir nia, iha área turizmu nian ba tinan 2026 nian ne’e, ETDA rejista ona kandidatu hamutuk 600 no iha área preparasaun ba servisu sira halo alvu 100.
Jornalista : Alexandra da Costa
Editór : Cancio Ximenes
