DILI, 27 Janeiru 2026 (TATOLI)—Diretór Gabinete Lisensiamentu no Rejistu Atividade Saúde iha Ministériu Saúde, Nuno da Costa de Jesus hateten Ministériu Saúde liuhusi Gabinete Lisensiamentu no Rejistu Atividade Saúde durante ne’e atribui ona lisensa operasionál ba Unidade Saúde Primária hamutuk 165 no Farmásia Privada hamutuk 186.
“Komesa kedas husi Governu anteriór to’o agora Ministériu Saúde fó ona lisensa ba Unidade Saúde Primária hamutuk 165 ne’ebé mak estabelese ona no mós ba Farmásia Privada 186 ne’ebé mak iha ona territóriu. Husi Unidade Primária saúde hamutuk 351 ne’e, iha 49 mak ita atribui iha tinan 2025, maibé barak liu iha Dili,” Nuno da Costa de Jesus ba Jornalista sira iha nia kna’ar fatin, Kaikoli, Tersa (26/01).
Nia dehan Ministériu saúde fó lisensa iha tipu rua, ida mak Unidade Primária Saúde no ida mak Farmásia Importadora. Sira-ne’e mak hatama ai-moruk mai iha Timor-Leste.
“Iha-ne’e ita fó lisensa ho tipu rua. Ida mak Unidade Primária Saúde no ida mak Farmásia. Ne’ebé, tuir Lei númeru 2/2025 ne’e, ba iha Farmásia ne’e mak fa’an rahun, ida fali Farmásia Importadora ne’e sira hatama ai-moruk,” nia dehan.
Tanba, daudaun ne’e Minsiteriu Saúde seidauk identifika ema estranjeiru na’in hira no ema Timor na’in hira mak loke klínika no farmásia.
Aleinde ne’e, Nuno informa, kona ai-moruk Herbal sira-ne’ebé mak durante ne’e halo promosaun iha mídia sosiál hanesan HWI, daudaun ne’e seidauk rejistu iha Ministériu Saúde maibé iha kompañia tolu mak hetan lisensa husi Ministériu Saúde kompostu husi Costa Gibra, Tiani ho Keling.
Nia haktuir dadaun ne’e Ministériu Saúde iha ona lei atu regulariza ai-moruk herbal sira-ne’ebé sirkula iha Timor-Leste.
“Sira obrigatoriamente tenke mai rejistu no foti lisensamentu iha Ministériu Saúde hodibele atribui lisensa ba sira,” Nuno realsa.
Jornalista: Osória Marques
Editór: Xisto Freitas da Piedade
