DILI, 27 Janeiru 2026 (TATOLI)—Polísia Nasionál Timor-Leste (PNTL) liuhusi Komandu Munisípiu Dili prepradu atu asegura vizita Primeiru-Ministru (PM) Austrália, Anthony Albanese iha Dili iha loron 28 to’o 29 Janeiru.
Komandante PNTL Munisípiu Dili, Superintendente Xefe Polísia Orlando Gomes, hateten, Komandu Munisípiu Dili hetan ona diretiva operasionál husi Komandu Jerál no Komandu Munisípiu Dili hodi prepara nia planu espesífiku, liuliu tátiku sira ne’ebé mak atu implementa iha terrenu atu asegura vizita bainaka espesiál ne’e mai no fila ho di’ak.
“Ita koloka ona ita-nia membru sira tuir planu ne’ebé mak Komandu Munisípiu Dili iha, ne’ebé sei hetan apoiu husi Unidade Espesiál Polísia husi Unidade Polísia Marrítima no Unidade Polísia Fronteira ne’ebé destaka iha Aeroportu nomós husi ita-nia forsa F-FDTL. Tanba ne’e atu asegura ita-nia Primeiru-Ministru Austrália mai Timor-Leste la’o di’ak,” Orlando Gomes hateten ba Ajénsia TATOLI iha ninia knaar fatin, Eskudra Dom Aleixo Ai-Mutin, Tersa ne’e.
Notísia relevante : PM-PR hala’o enkontru preparasaun atu simu PM Austrália Anthony Albanese
Nia dehan, ba seguransa aban, PNTL sei hatún membru hotu iha terrenu atubele halo seguransa.
“Rute ne’ebé mak Primeiru-Ministru Austrália sei liu mak husi Aeroportu dalan protokolu, ida-ne’e ita sei koloka membru sira atu fó seguransa másimu ba fatin sira ne’e, nune’e mós dalan Palásiu Prezidensiál, Palásiu Governu no Parlamentu Nasionál no ita prontu atu asegura dalan sira ne’e no ita mós sei halo patrullamentu hodi haree kona-ba kestaun seguransa ne’ebé mak di’ak,” nia informa.
Hatan kona-ba posibilidade rute sira ne’ebé sei blokeia, Komandante Orlando Gomes hateten, ne’e depende ba situasaun iha terrenu mak bele justifika, iha rute balun bele blokeia iha balun labele blokeia.
Jornalista : Natalino Costa
Editora : Julia Chatarina
