Projetu Estrada Letefoho – Atsabe – Lolotoe, Komunidade : “Ida ne’e mak ami hein hela”
DILI, 27 Janeiru 2026 (TATOLI)— Governu konfirmadu sei halo lansamentu ba kontratu projetu estrada husi Munisípiu Ermera ba Munisípiu Bobonaro iha nivel postu administrativu. Projetu estrada hirak ne’e mak hanesan Letefoho ba Atsabe, Atsabe ba Lourba, Lourba ba Bobonaro, Bobonaro ba Lolotoe.
Asuntu ne’e hato’o rasik husi Ministru Obras Públika, Samuel Marçal iha lansamentu Estrada Glenu Letefoho ne’ebé halao iha EBC Eraulu, Segunda (26/01/2026).
Ministru Marçal hatete mega projetu barak dadauk ne’ebé iha prosesu aprovisionamentu nia laran no kuaze iha faze final. “Agora trosu preparadu kauze final nian mak husi Letefoho ba Atsabe, Atsabe ba Lourba, Lourba ba Bobonaro, Bobonaro ba Lolotoe,” dehan Ministru Marçal.
Hatan ba deklrasaun ne’e, Administrador Postu Administrativu Atsabe, Munisípiu Ermera, Manuel Soares de Araújo hato’o agradese ba Governu ne’ebé lidera husi Primeriu Ministru, Kay Rala Xanana Gusmão tanbá sei fó benefisiu ba povu agrikultor sira.
“Ezatamente kuandu realiza duni, ita hotu hetan benefisiu bo’ot liu-liu ba povu agrikultor sira atu lori produtu ba merkadu ho fasil no ida ne’e mak povu nia hanoin,” Manuel dehan ba TATOLI via telefone.
Nune’e mós Xefe Suku Laçao, Abrão da Conceição hato’o komunidade nia espresaun kontente tanbá projetu ne’e sei liga Estrada hosi Letefoho, Atsabe, Lolotoe no ba Lourba – Bobonaru.
“Iha ami nia area Suku Lação sei sai hanesan benefisiariu no komunidade, ida ne’e mak ami hein hela tanba tinan barak ona desde ukun aan komunidade infrenta problema Estrada,” Abraõ dehan.
Xefe Suku ne’e rekoñese komunidade Atsabe durante ne’e hasoru problema oin-oin ba asesu edukasaun, saúde no merkadu tanba kondisaun Estrada ne’ebé laiha rehabilitasaun tinan barak.
“Lo’os duni katak durante ne’e Komunidade sira iha parte hotu sente tanba deit dalan, liu-liu difikulta mos inan isin rua sira tanba estrada ladiak entaun susar atu halo transferensia lalais husi postu saude iha Suku ne’e ba Atsabe Villa nune’e ikus mai inan ho oan sai vitima. Estudante sira atu ba eskola mós sente difikulta tanba kondisaun Estrada. Inklui agrikultor sira atu lori produtu ba merkadu,” Nia esplika.
Nia garante katak komunidade lokal prontu kontribui ba desenvolvimentu saida deit mak governu lori mai iha baze no lori moris diak no benefisiu ba povu sira.
Jornalista : Cidalia Fátima
Editor : Armandina Moniz
