DILI, 28 Janeiru 2026 (TATOLI)—Ekipa Emanuel Football Club (FC) iha mehi manán Aitana FC iha faze kualifikasaun Grupu A Tasa Liga Federasaun Futeból Timor-Leste (FFTL) 2025 ne’ebé sei realiza iha Estádiu Munisipál Dili, Sesta (30/01/2026).
Asistente Treinadór Emanuel, Van Basten esplika hafoin ramata jogu abertura iha semana rua bá kotuk kontra AD SLB, Emanuel FC hala’o kedas treinu ka preparasaun másima ba jogu ikus kontra Aitana FC.
“Ami-nia mehi manán no hakarak atinje golu to’o tolu,” Van Basten hateten iha Estádiu Munisipál Dili, Kuarta ne’e.
Van Basten relata maioria jogadór Emanuel rekoperadu no pursentu 100 preparadu tanba hakarak atinje pontu tolu no rekolla golu tolu husi Aitana nune’e bele hakat bá faze meiu finál Tasa Liga FFTL.
Notísia relevante: Tasa Liga FFTL 2025, AD SLB impata ho Emanuel FC, DIT derrota 1-2 ho Assalam
Jogu entre Emanuel FC no Aitana sei determina ekipa elementu Van Basten no AD SLB nia destinu hodi hakat bá faze meiu finál iha Tasa Liga FFTL 2025.
Emanuel FC rekolla pontu ida hafoin iha jogu abertura impata ho AD SLB. Enkuantu, Aitana FC serteja ona eliminadu husi Tasa Liga FFTL hafoin derrota ida no pontu 0 iha tabela klasifikasaun Grupu A.
Aleinde ne’e, Grupu A lidera husi AD SLB ho totál pontu haat hafoin manán kontra Aitana no impata ho Emanuel FC nune’e iha produtividade golu tolu.
Jornalista: Natalino Belo
Editór: Xisto Freitas da Piedade
