DILI, 28 Janeiru 2026 (TATOLI)—Deputy Team Lider Programa Nabilan, Maria Verónica, hateten pilár tolu (3) ne’ebé importante hodi kontribui ba atinjimentu Planu Asaun Nasionál Violénsia Bazeia ba Jéneru (PANVBJ).
“Haree ba PANVBJ ne’e iha pilár tolu ne’ebé importante. Ida mak pilár prevensaun ba violénsia hasoru feto. Pilár seluk kona-ba pozisaun servisu ne’ebé atu fó atendimentu ba feto no labarik ne’ebé iha esperiénsia violénsia hasoru feto no ikus mak pilár apoiu justisa nian. Entaun, pilár tolu ne’e interligadu ne’ebé ami Programa Nabilan kontribui liuhusi parseiru sira no sosiedade sivíl hodi kontribui ba Governu Timor-Leste,” Maria Verónica dehan ba jornalista sira iha serimónia avaliasaun ba progresu implementasaun PANVBJ períodu tinan 2022-2032, iha Suai Room, Kuarta ne’e.
Maria Verónica hatutan hosi pilár tolu mak Governu liuhusi Sekretaria Estadu Igualdade halo advokasia no sensibiliza programa violénsia bazeia ba jéneru ba ensinu superiór inklui komunidade.
“Hosi implementasaun PANVBJ ne’e ita nota iha progresu di’ak tanba liga ba pilár prevensaun ne’e ita hahú ona tama bá universidade sira no komunidade einjerál. Tanba violénsia ne’ebé akontese no la’ós normál ne’e ema komesa buka ajuda korajen hosi organizasaun ida-ne’ebé mak fornese asisténsia ba feto no labarik feto sira. Tanba ne’e, implementasaun PANVBJ ne’e presiza servisu koletivu tantu Governu, parseiru, sosiedade sivíl no komunidade tanba kuandu tau ita-nia esforsu hamutuk ita sei bele atinje saida mak PANVBJ iha,” nia esplika.
Iha fatin hanesan, Diretór Jerál SEI, Armando da Costa informa atividade ida ohin ne’e SEI hamutuk ho liña ministeriál sira halo avaliasaun ba implementasaun PANVBJ, sosiedade sivíl sira, parseiru internasionál no apoiu sira hosi DFAT liuhusi programa Tap Nabila no progama PANVBJ.
“Tanba ne’e, ita realiza workshop loron ida hodi haree ba jornada implementasaun PANVBJ ba faze datoluk nian ne’ebé tama ona ba tinan tolu. Iha loron ida-ne’e ita sei haree hamutuk hodi avalia duni nia progresu, iha progresu balun ne’ebé ita hala’o kada pilár. Ezemplu, ita estabelese ona komisaun interministeriál ba implementasaun liuhusi rezolusaun Governu nune’e mós ita establese ona feramentu balun ba iha monitorizasaun no avaliasaun nian no ekipa mós halo hela servisu ba iha monitorizasaun no agora prepara hela draft relatóriu ba iha implementasaun durante tinan tolu ikus ne’e,” nia haktuir.
Responsavel ne’e akresenta kona-ba prevensaun ninian iha atividade lubun ida maka SEI realiza liuhusi diseminasaun infomasaun sira, nune’e mós formasaun ba universidade ho eskola sekundária sira iha nasionál no mós munisípiu sira hodi hasa’e koñesimentu asuntu kona-ba violénsia hasoru feto no labarik feto iha fatin públiku.
“Ita-nia planu asaun ne’e kauza komún ne’ebé ita iha grupu traballu jéneru estabelese iha munisípiu hotu. Ita iha parseiru barak ezemplu hosi família ONU, UN Women, UNFPA, UNDP no mós seluk tan ne’ebé iha investimentu uitoan inklui parseiru boot hanesan DFAT liuhusi nia programa lubun ida hanesan Progama Nabilan,” nia subliña.
Jornalista: Osória Marques
Editór: Xisto Freitas da Piedade
