PM Albanese husu Timor-Leste aumenta traballadór timoroan servisu iha Austrália

DILI, 28 Janeiru 2026 (TATOLI)—Primeiru-Ministru Austrália, Anthony Albanese, propoin Governu Timor-Leste atu aumenta tan númeru traballadór timoroan iha Austrália liuhusi programa Pacific Australia Labour Mobility (PALM).

“Agora iha ona timoroan rihun lima (5.000) ne’ebé servu iha Austrália, maibé ami hakarak aumenta ba númeru traballadór to’o rihun sanulu (10.000), ne’ebé iha interese ba ami-nia nasaun rua,” Primeiru-Ministru Austrália, Anthony Albanese, informa ba jornalista sira iha Palásiu Governu, ohin.

Xefe Governu Austrália dehan, sira nafatin apoiu sira-nia parseiru sira iha jornada dezenvolvimentu ekonómiku no rezilénsia importante loos ba seguransa oportunidade ba rejiaun tomak.

Tanba ne’e. PM Albanese kontente atu anunsia programa rua mak programa dezenvolvimentu setór privadu no inisiativa dezenvolvimentu umanu atu hadi’ak kualidade no loke asesu ba servisu saúde krítiku sira, edukasaun no apoiu ba ema ho nesesidade espesiál, ne’e área sira-ne’ebé Austrália orgullu atu apoiu Timor-Leste nia aspirasaun, kreximentu no bem-estar timorens sira-nian,” nia afirma.

Iha biban ne’e, Primeiru-Ministru, Kay Rala Xanana Gusmão, hateten Australianu sira, hanesan Primeiru-Ministru Anthony Albanese, mak apoiu ativamente sira-nia luta ba independénsia, sira reafirma kompromisu atu fortalese ligasaun entre sira-nia povu sira inkluí sosiedade sivíl, igreja no grupu amizade, grupu eskola no veteran sira.

“Tanba ne’e, ami diskute mós Programa Mobilidade Traballadór Austrália nian, ne’ebé kontinua forne benefísiu reál ba traballadór timorense sira no sira-nia família. Ami halo akordu atu servisu hamutuk hodi aumenta númeru timorense sira-ne’ebé bele servisu iha Austrália. Ligasaun ema ba ema nafatin iha korelasaun ami-nia relasaun nian,” nia informa.

Entretantu, tuir dadus ne’ebé Sekretária Estadu Formasaun Profisionál no Empregu (SEFOPE) rejista ne’e, traballadór timoroan ne’ebé servisu iha Austrália hamutuk 4.840.

Jornalista : Alexandra da Costa

Editór        : Cancio Ximenes