PM Austrália kumprimenta Komunidade Timor-Leste ho Mini Moke
DILI, 28 Janeiru 2026 (TATOLI)— Primeiru-Ministru Austrália, Anthony Albanese sente kontente tebes bainhira hakat ain ba kareta ikoniku Prezidente Repúblika Timor-Leste, Jose Ramos-Horta ho naran Mini Moke.
Oras hatudu tuku 10:20 dader Oras Timor-Leste (OTL), bainhira delegasaun ofisiál Primeiru-Ministru Austrália nian sai hosi Aeroportu Internasionál Nicolau Lobato Dili nian.
Hanesan tradisaun, Prezidente Timor-Leste, José Ramos-Horta lori nia Mini Moke ikónika, hodi simu lider mundial sira. Primeiru-Ministru Austrália, Anthony Albanese ho oin midar hateke ba kareta ne’ebé nakloke tebes sem iha seguransa iha ninin ba ninin husi kareta.
Maske nune’e la ho duvida PM Australia simu konvite Preziden Ramos-Horta sae kareta ikoniku ne’e no tur kedas iha fatin ba liman karuk nian, nune’e mós iha tur fatin kotuk iha ona Primeiru-Ministru Timor-Leste, Kay Rala Xanana Gusmão. Primeiru-Ministru Austrália nian haree hamnasa ho kontente bainhira karreta klásiku ne’e hahu husik hela Aeroprotu.
Iha aeroportu nia liur, labarik no estudante inklui komunidade sira hein hahu tuku 09:00 dader OTL. Sira hamriik iha sikun dalan hotu-hotu, lori bandeira Timor-Leste, bandeira Austrália nian, no foto Prezidente Ramos-Horta no Primeiru-Ministru Austrália nian.
Hare delegasaun, labarik sira halai tuir kareta, hodi hakilar “Viva! Viva!” no “Austrália!”, enkuantu hamnasa kontente hodi kumprimenta PM Austrália nian.
Iha viajen tomak hosi Aeroportu ba Palásiu Prezidensiál, PM Austrália hamriik no kumprimenta povu timoroan, hodi marka vizita espesiál ida ne’ebé hatudu relasaun bilaterál besik no besik entre nasaun rua ne’e.
Situasuan ne’e sai entuziasmu liu tan tanba Austrália koñesidu nu’udar nasaun ida ne’ebé simu traballadór timoroan barak liu liuhosi programa Pacific Labor Scheme (PLS) dezde tinan 2012, hodi hamenus dezempregu no hametin liután lasu entre nasaun rua ne’e.
Konaba Mini Moke
Prezidenti Ramos-Horta nia kareta klasiku Mini Moke durante vizita ne’e la’os buat foun ida. Antes ne’e, iha loron 23 fulan-Setembru tinan 2025, veíkulu hanesan uza hodi simu Primeiru-Ministru Malázia nian, Dato’ Seri Anwar Ibrahim, iha tempu ne’ebé ema barak haksolok ho entuziazmu hanesan. Prezidente Ramos-Horta lori karreta sai hosi salaun VIP aeroportu nian, hodi subliña símbolu ida hosi lideransa ne’ebé haraik-an no besik ba povu.
Mini Moke azúl ida ne’e baibain uza iha vizita ofisiál no privadu sira iha Dili no área sira ne’ebé hale’u. Figura importante balun ne’ebé sa’e ona iha karreta ne’e inklui: Prezidente Senadu Kamboja nian, eis-primeiru-ministru Hun Sen, jornalista australianu Indira Naidoo iha programa televizaun Compass, no Liurai Brunei Darussalam nian, Sultan Haji Hassanal Bolkiah Mu’izzaddin Waddaulah.
Mini Moke mós hatudu beibeik iha eventu públiku sira, hanesan korrida bisikleta nian, ne’ebé reflete Prezidente Ramos-Horta nia estilu lideransa ne’ebé haraik-an no laran-maus.
Mini Moke orijinalmente dezeña hanesan veíkulu militár kmaan ida hosi British Motor Corporation (BMC) iha tinan 1963, ho naran ne’ebé kombina “Mini” hosi komponente Mini klásiku no “moke”, termu antigu ida ba kuda-burru. Maski protótipu inisiál la konsege prienxe ezijénsia militár sira, ida-ne’e komersializa hanesan veíkulu sivíl no sai popular iha tasi-ibun no illa tropikál sira. Produsaun ba Mini Moke akontese iha Reinu Unidu, Austrália, Portugál, no Itália, ho totál maizumenus unidade 50,000 ne’ebé maka produz.
Iha tinan hirak ikus ne’e, Mini Moke hetan ona resurjénsia ida, inklui versaun elétriku ida ho alkanse 112 km no velosidade másimu 72 km/h. Veíkulu ne’e mós sai hanesan íkonu kulturál, mosu iha filme 70 resin, inklui filme James Bond nian, no asosiadu ho selebridade sira hanesan Brigitte Bardot, Paul McCartney, no Beach Boys.
Ho nia dezeñu nakloke, kór nabilan, no istória naruk, Mini Moke sai nafatin símbolu ba simplisidade, kreatividade, no líder ida nia besik ba povu, hanesan Prezidente Ramos-Horta hatudu bainhira simu Primeiru-Ministru Austrália iha Dili.
Jornalista: Cidalia Fátima
Editora : Armandina Moniz
