Populasaun Loko-Loko hasoru difikuldade ba bee-moos
VIKEKE, 28 Janeiru 2026 (TATOLI)–Xefe Aldeia Loko-Loka, Suku Matahoi, Postu Administrativu Uatulari, Munisípiu Vikeke, Luís Miguel hateten durante tinan barak ona populasaun Aldeia Loko-Loko hasoru difikuldade ba bee-moos.
“Durante ne’e ha’u akompaña komunidade Aldeia Loko-loko ne’e terus liubá bee-moos. Komunidade tenke lalin jerigen ba kuru bee iha mota ho distánsia kilómetru haat hanesan ne’e hodi asesu bee,” Luís Miguel ba jornalista sira iha Aldeia Loko-Loko, Kuarta ne’e.
Nia haktuir preokupasaun ne’e autoridade lokál sira hato’o beibeik ba parte relevante, maibé t’o agora seidauk iha solusaun.
Iha fatin hanesan, abitante husi Aldeia Loko-Loko, Ricardo Sarmento, haktuir populasuan iha Aldeia Loko-Loko maioria idade avansada mak la’o ba kuru bee hodi konsume.
“Ami husu ba Governu atu tau-matan ba ami hodi dada bee-moos atu populasaun bele asesu,” nia hato’o.
Aleinde ne’e, Xefe Suku Matahoi, António Amaral rekoñese komunidade parte Loko-Loko durante ne’e enfrenta difikuldade ba bee-moos tanba iha área Loko-Loko rekursu bee-matan permanente laiha.
Tuir dadus, populasaun husi Aldeia Loko-Loko totál hamutuk na’in-126 no uma-kain hamutuk 64.
Kona-ba preokupasaun ne’e, Diretór Servisu Munisipál Agua no Saneamentu (SMASA), Guilhermino Gomes Soares hateten SMASA rejista asuntu referidu.
“Ita hotu hatene katak diresaun SMASA mak nu’udár kompeténsia ba bee no saneamentu liuliu ba área rurál. Nune’e, komunidade tenke aprezenta ba nivel aldeia, suku, suku bá asembleia postu hodi aprezenta mai munisípiu. Maibé, ami mós nafatin halo levantamentu dadus populasaun ne’ebé seidauk asesu ba bee-moos hodi tau ba planu prioridade nune’e bá-oin ita buka dalan hodi rezolve kestaun ne’e,” nia tenik.
Jornalista: Vitorino Lopes da Costa
Editór: Xisto Freitas da Piedade
