DILI, 28 Janeiru 2026 (TATOLI)—Diretór Jerál Sekretaria Estadu Igualdade (SEI), Armando da Costa hateten tinan-ne’e SEI apoiu fundu rihun $800 ba feto rurál iha territóriu hamutuk 40 atu hala’o atividade negósiu.
“Iha tinan ne’e SEI apoiu fundu rotativu ho montante rihun $800 ba grupu feto rurál hamutuk 400 husi munisípiu 13 hodi hala’o atividade negósiu hanesan loke kioske no soru-tais inklui haki’ak animál atu hasa’e rendimentu nune’e bele sustenta ba nesesidade família nian,” Diretór Jerál dehan ba jornalista sira iha Suai Room, Kuarta ne’e.
Responsavel dehan apoiu fundu ida-ne’e ba ema vulneravel sira liuliu ema ho kondisaun defisiénsia ne’ebé laiha forsa hodi hala’o atividade loron-loron, entaun SEI apoiu osan uitoan ba sira hodi fasilita sira uza ba nesesidade loron-loron.
Enkuantu, iha 2025 SEI oferese fundu rotativu hamutuk $65.000 hodi apoiu ba grupu feto rurál sira.
“Osan ne’e apoiu ba grupu feto rurál hamutuk 30 iha territóriu, hodi halo atividade kuda modo, soru-tais, suku hena, haki’ak fahi no manu,” Armando dehan.
Nia dehan kada grupu hetan fundu depende ba atividade grupu nian hodi fasilita sira-nia atividade negósiu ne’e.
Iha fatin hanesan, Sekretária Estadu Igualdade, Elvina Sousa Carvalho hateten asosiasaun empoderamentu feto no grupu ekonómiku sira-neʼebé hetan fundu hosi SEI ne’e, husu grupu sira iha asosiasaun feto munisípiu atu utiliza osan ho didi’ak.
“Sekretária Estadu nia intensaun oferese fundu ne’e hodi empodera feto sira no finansia ekonomia família uma laran nian,” nia hateten.
Elvina informa grupu feto sira-ne’ebé mak uza osan la tuir regra mak sei la hetan opurtunidade iha futuru, tanba SEI iha ekipa monitorizasaun ne’ebé forte hodi haree no avalia kuandu dezenvolvimentu ba utilizasaun la la’o.
“Nafatin enkoraja ita-boot sira katak liuhosi fundu ne’e tenke dezenvolve ho di’ak ita-nia negósiu,” nia tenik.
Jornalista: Osória Marques
Editór: Xisto Freitas da Piedade
