DILI, 28 Janeiru 2026 (TATOLI)—Primeiru-Ministru, Kay Rala Xanana Gusmão, konvoka enkontru bilaterál ho Primeiru-Ministru Austrália, Anthony Albanese iha ámbitu vizita ofisiál durante loron rua iha Timor-Leste, hodi reafirma kompromisu kooperasaun bilaterál iha áre oioin hanesan ekonómia, seguransa no dezenvolvimentu relasaun amizade.
Xanana hateten, ho onra boot tebes ba Primeiru-Ministru Austrália, António Albanese, ba vizita ofisial ne’e tanba vizita ne’e mak momentu importante iha relasaun entre nasaun rua hodi refleta amizade, konfiansa no partisipasaun entre Timor-Leste no Austrália.
“Ami-nia diskusaun ohin loron ne’e, la’ós de’it di’ak maibé mós produtivu. Ami iha akordu atu harii partisipasaun foun ba era foun ne’ebé refleta maduru ba ami-nia relasaun no futuru ne’ebé ami partilla ba, no relasaun forma husi solidariedade iha tempu konflitu no husi partisipasaun iha dame,” Primeiru-Ministru, Kay Rala Xanana Gusmão, informa ba jornlaista sira iha Palásiu Governu, ohin.
Xefe Governu ne’e dehan, sira reafirma sira-nia kompromisu partilladu ba rejiaun ne’ebé dame no prósperu, tanba Austrália mak apoiadór forte ba Timor-Leste nia adezaun ba ASEAN.
“Ami mós reafirma importánsia lei internasionál, inklui Konvensaun Nasaun Unida kona-ba Lei Tasi nian. Ami-nia tratadu fronteira marítima iha tinan 2018 sai ezemplu forte oinsá disputa sira bele rezolve dame no loos liuhusi diálogu no lei,” nia hateten.
Iha biban ne’e, nia anunsia katak Timor-Leste identifikadu rai ida iha Díli besik edifísiu Ministériu Negósiu Estranjeiru no Kooperasaun, ne’ebé Governu sei fó ba Austrália atu harii ninia embaixada foun, fó rai ne’e permite atu retribui sira-nia territóriu ne’ebé fó ba Timor-Leste atu bele harii Timor-Leste embaixada iha Cambera.
“Ami kontente katak Austrália planeia harii embaixada foun ne’ebé boo- liu ne’ebé refleta sira-nia kompromisu forte no naruk ba Timor-Leste, no ami partilha vizaun ba mundu ne’ebé dame, ne’ebé dezenvolvimentu inkluzivu,” nia hateten.
Primeiru-Ministru Austrália, Anthony Albanese, hato’o agradesementu ba ninia vizita dahuluk iha Dili, tanba povu Timor kompostu husi labarik ki’ik no ema sira-ne’ebé hela besik iha estrada ninin di’ak tebes ho haksolok simu nia bainhira halo movimentu husi aeroportu, entaun ne’e sinál ida-ne’ebé hatudu efeitu di’ak no entre nasaun rua ne’e.
“Ha’u mós agradese ba Primeiru-Ministru no mós Prezidente Repúblika, ne’ebé tula nia ho ninia karreta, entaun Timor-Leste mak vizaun Austrália nian. Tanba ne’e mak ohin loron ami refleta ami-nia forsa amizade no relasaun liuhusi asina paseria ba partisipasaun foun ida ba era foun, hodi eleva amizade entre Timor-Leste no Austrália ba nivel foun,” Primeiru-Ministru Austrália, afirma.
Nia dehan, partisipasaun ne’e konsolidasaun ba sira-nia kooperasaun iha ekonomia, seguransa, dezenvolvimentu no relasaun ema ba ema iha área hotu-hotu, entaun ne’e akordu ne’ebé kompletu loos bele rekoñese respeitu ne’ebé mutua ba soberania nasionál no sira-nia kompromisu partilladu ba kontinuasaun kooperasaun no konsultasaun, la’ós de’it entre nasaun rua maibé ko’alia mós atu servisu hamutuk.
“Ami diskute mós ami-nia interese ohin loron iha harii rezilénsia ekonómika no fornese oportunidade ba ema hotu-hotu iha Timor-Leste. Hanesan Primeiru-Ministru dehan, ami moris iha tempu insersu ho turbulaun barak iha mundu, ami mak parseiru ne’ebé loloos no ami bele halo kooperasaun iha dezenvolvimentu vizaun ne’ebé ami partilla ba rejiaun dame, estavel no prosperu,” nia hateten.
Tamba ne’e, nia dehan, Austrália atu sai parseiru dezenvolvimentu boot-liu ba Timor-Leste liuhusi partisipasaun foun ne’e, sira sei kontinua servisu ho Timor-Leste iha prioridade konstrusaun nasionál ne’ebé importante ba povu nasaun rua ne’e rasik.
Jornalista : Alexandra da Costa
Editór : Cancio Ximenes
