DILI, 28 Janeiru 2026 (TATOLI)—Governu Timor-Leste liuhusi Sekretária Estadu Formasaun Profisionál no Empregu (SEFOPE) kontinua koopera ho Governu Korea liuhusi Polísia Imigrasaun atu asegura traballadór timoroan sira labele sai husi sistema.
Diretór Jerál Sekretária Estadu Formasaun Profisionál no Empregu, Carlito do Rosário Cabral, hateten SEFOPE nafatin koopera ho parte polísia imigrasaun no mós Governu Korea hodi deteta traballadór ne’ebé halai sai husi sistema, nune’e númeru ilegál ne’e labele sa’e beibeik, tanba se lae bele afeta ba kooperasaun no bele hapara provizória Timor-Leste nia kooperasaun.
“To’o agora, ita seidauk iha problema boot maibé númeru traballadór ne’ebé sai ilegál ne’e iha,” Diretór Jerál Sekretária Estadu Formasaun Profisionál no Empregu, Carlito do Rosário Cabral, informa ba Agência Tatoli iha nia kna’ar fatin, Kaikoli, ohin.
Mekanizmu atu redús aktu traballadór ne’ebé halai sai husi sistema ne’e, nia dehan, Governu Timor-Leste nafatin koopera ho Governu kompetente iha Korea, nune’e bele buka tuir sira-ne’ebé halai sai ka sees husi sistema ne’e bele deporta sira fila-mai Timor-Leste.
“Tanba ne’e regra iha ema-nia nasaun, nune’e ita labele interven katak ida-idak iha ninia lei rasik hodi vigora atu regula asaun hirak ne’e,” nia dehan.
Entretantu, tuir dadus, traballadór timoroan ne’ebé sees husi sistema Korea nian maibé seidauk deporta fila-mai Timor-Leste hamutuk na’in 1.415.
Husi númeru ne’e kompostu husi área peska nian ne’e traballadór mane hamutuk na’in-1.224, iha área fábrika feto na’in-13 no mane na’in-167, no iha área agrikultura feto na’in-tolu (3) no mane na’in-ualu (8).
Enkuantu iha fali Austrália nian, traballadór timoroan sira-ne’ebé sai husi Sistema ne’e hamutuk na’in-1.281, ne’ebé kompostu husi tipu insidente hanesan isu ka problema iha ema na’in-17, hetan kanek na’in-31, alegasaun iha na’in-tolu (3), iha fali moras na’in-ualu (8) no iha DE/LOT hamutuk na’in-242.
Jornalista : Alexandra da Costa
Editór : Cancio Ximenes
