DILI, 28 Janeiru 2026 (TATOLI) – Primeiru-Ministru Austrália, Anthony Albanese to’o iha Aeroportu Internasionál Prezidente Nicolau Lobatu, Dili, tuku 9:52 dadeer oras Timor-Leste. Aviaun ne’ebé tula Primeiru-Ministru Austrália nian maka Royal Australian Air Force ho marka A62-002.
Hahu kedas tuku 08:00 dader OTL (oras Timor-Leste) , Aeroportu nakonu ho ofisiál protokolu oioin no pesoál benvindu nian husi dansa kultural sira inklui prezensa ekipa saúde, F-FDTL, militár Austrália, ofisiál governu, no jornalista nasionál no internasionál sira. Preparasaun protokolu hotu-hotu, inklui tapete mean ne’ebé nahe hosi sala VIP to’o pontu ne’ebé Primeiru-Ministru Austrália tau ain ba dala uluk iha Dili, iha ona.
Benvindu tradisionál ne’e animadu, ho grupu dansa tradisionál tolu no dansa modernu hamutuk 150. Grupu sira maka Lezeival, Wehali, no St. Antonio. Dansa-na’in sira kaer bandeira Timor-Leste no Austrália nian no hala’o kombinasaun dansa tradisionál no kriasaun juventude nian, simboliza respeitu no envolvimentu ho jerasaun foun.
Aleinde ne’e, labarik-mane ida no labarik-feto ida hosi grupu Lezeival simu Primeiru-Ministru Austrália nian hodi tara tais, textil tradisionál Timoroan nian, nu’udar sinál respeitu nian. Marka prezensa mós grupu dansa tradisionál Karketu Motain, ne’ebé hamutuk ho lia-na’in tradisionál sira, subliña valór kulturál no simbolizmu respeitu nian iha tradisaun akollimentu estadu nian.
Iha tuku 10:03 dadeer OTL, odamatan aviaun nian loke, no Primeiru-Ministru Austrália nian hahú tun hosi aviaun nia eskada sira. Liutiha minutu rua, nia la’o tuir tapete mean no kaer liman ho Prezidente Repúblika Timor-Leste, José Ramos-Horta, Primeiru-Ministru Timor-Leste, Kay Rala Xanana Gusmão, no membru governu sira ne’ebé marka prezensa.
Hafoin serimonia dansa kultural, ekipa lao kedas ba iha Salaun VVIP – AIPNL no hafoin sai hosi sala VIP, karreta ofisiál preparadu iha oin hodi transporta Primeiru-Ministru Austrália nian ba Palásiu Prezidensiál inklui kareta ikoniku Prezidente Timor-Leste nian ho naran Moke.
Iha Aeroportu liur, estudante sira husi eskola sira iha area Comoro Madohi forma ona husi tuku 09:00 dadeer OTL. Lori bandeira Timor-Leste no Austrália nian, hamutuk ho fotografia sira hosi Prezidente Ramos-Horta no Primeiru-Ministru Austrália nian, sira hamriik iha estrada ninin hodi kumprimenta.
Atmosfera ne’e sai furak liu tan, reflete relasaun bilaterál ne’ebé forte tebes ho komunidade nia envolvimentu hodi simu PM Australianu ne’e.
Ajenda PM Australia iha Timor-Leste
Husi Aeroportu Prezidente Nicolau Lobato direta Palásiu Prezidensiál sei tula husi karreta Moke, kondúz husi Prezidente Repúblika TL no akompaña husi PM TL.
PM Austrália hamutuk ho PR no PM TL to’o iha Palásiu Prezidensiál, iha oras 10:30 OTL, simu ho Gurda de Honra ne’ebé inísia ho Inu Nasionál nasaun rua nian no inspesaun parada militár.
Hafoin tama ba salaun ASEAN: asina livru onra no foto ofisiál.
Oras 10:55 OTL hala’o enkontru kortezia entre Prezidente Repúblika, J. Ramos-Horta no Primeiru-Ministru Austrália, Anthony Albanese.
Oras 11:00 OTL hala’o enkontru bilaterál entre Prezidente Repúblika TL akompaña husi Membru Guvernu ho PM Austrália ho nia delegasaun.
Parte seluk, iha iha oras 11:40 OTL, Primeiru-Ministru, Kay Rala Xanana Gusmão, sei simu vizita husi Primeiru Ministru Austrália, Anthony Albanese, iha Palásiu Governu.
Primeiru Ministru Kay Rala Xanana Gusmão no Austrália hala’o reuniaun Tête-á-Tête iha oras 11:45 OTL, iha Palásiu Governu no oras 12:05 OTL to’o 12:35 OTL hala’o reuniaun bilaterál.
Primeiru Ministru rai rua hala’o serimónia formál iha oras 12:40 OTL to’o 12:45 OTL, kona-ba “Nova Parceria para a Nova Era” iha salaun Konsellu Ministru, Palásiu Governu.
Iha oras 13:05 to’o 13:25, Xefe Governu rai rua hala’o komferénsia imprensa konjunta iha Palásiu Governu, Dili.
Iha oras 14:50 OTL, Xefe Governu Australia ho delegasaun iha Parlemen Nasional no hasoru malu ho Prezidenti PN, Maria Fernanda Lay. Depois ne’e, kontinua kedan hola parte iha sesaun Plenaria iha PN.
Oras 16:00 OTL – Prezidente Repúblika, J. Ramos-Horta kondekora ho orden Grande Kolár Timor-Leste ba PM Austrália, iha salaun Xina.
Iha fali oras 19:00-20:30 OTL, Timor-Leste sei oferese Jantar hamutuk ba PM Australia ho delegasaun iha Palacio Nobre Lahane.
Jornalista: Cidalia Fátima
Editora : Armandina Moniz
