DILI, 29 Janeiru 2026 (TATOLI)—Ekipa Assalam Football Club sei esforsu an gaña vitória husi Nagardjo faze iha kualifikasaun Grupu B tanba hakarak hakat bá meiu finál Tasa Liga Federasaun Futeból Timor-Leste (FFTL) 2025 ne’ebé sei hala’o iha Estádiu Munisipál Dili, Sábadu (31/01/2026).
Treinadór Assalam, Adu Marques Namiruru esplika jogu kontra Nagardjo konsideradu nu’udár finál tanba deside Assalam hakat bá meiu finál hafoin DIT FC eliminadu husi Grupu B.
“Ha’u garante ba jogadór sira se rekolla pontu tolu husi Nagardjo, jogu ne’e sei furak. Ekipa ne’ebé manán sei bá meiu finál,” Adu Marques hateten iha Estádiu Munisipál Dili, Kinta ne’e.
Notísia relevante: Nagardjo FC sei esforsu gaña pontu tolu bainhira kontra Assalam
Nia relata Assalam FC iha tempu semana-rua hodi deskansa no halo treinu hodi prepara an di’ak liután hasoru Nagardjo maski ekipa rua iha pontu no produtividade golu hanesan iha tabela klasifikasaun Grupu B.
Adu argumenta katak nia observa ona Nagardjo FC bainhira kontra DIT no fiar an sei manán iha jogu ikus hafoin halo komparasaun tátika no materiál jogadór husi ekipa adversária.
Iha fatin hanesan, Kapitaun Ekipa Assalam, Martinho Filipe Lopes Belo garante sei esforsu másimu atu manán iha jogu ikus maski maioria ekipa Nagardjo reforsa husi jogadór Ponta Leste.
“Ami prontu ona atu gaña vitória bainhira kontra Nagardjo,” Martinho Belo promete.
Entretantu, Nagardjo FC rekolla pontu tolu hafoin manán DIT FC 2-1, iha-ne’ebé produtividade golu hanesan ho Assalam FC ne’ebé rekolla pontu tolu husi DIT FC.
Jornalista: Natalino Belo
Editór: Xisto Freitas da Piedade
