DILI, 28 Janeiru 2026 (TATOLI)—Ekipa Nagardjo FC sei esforsu gaña pontu tolu bainhira kontra Assalam iha faze kontinuasaun kualifikasaun Grupu B Tasa Liga Federasaun Futeból Timor-Leste (FFTL) 2025.
Treinadór Nagardjo FC, Eduardo Pereira esplika hafoin manán kontra DIT FC, Nagardjo kontinua kedas halo preparasaun másima mezmu hasoru difikuldade iha kampu nune’e sei masimiza iha jogu ikus kontra Assalam ne’ebé sei hala’o iha Estádiu Munisipál Dili, Sábadu (31/01/2026).
“Hafoin haree Assalam kontra DIT, hanesan treinadór prepara tátika maibé minutu 90 mak determina,” Eduardo Pereira hateten liuhusi konferénsia imprensa iha Estádiu Munisipál Dili, Kuarta ne’e.
Notísia relevante: DIT FC derrota 1-2 ho Nagardjo
Eduardo konsidera rekolla pontu tolu husi DIT FC sai nu’udár motivasaun ba ekipa liuliu jogadóra sira iha espíritu desportiva hodi hasoru Assalam ne’ebé konsideradu sei determina Nagardjo nia destinu iha faze meiu finál.
Nagardjo rekoñese matéria jogadór husi Assalam ne’ebé maioria husi primeira divizaun maibé Nagardjo iha kombinasaun jogadór husi terseira no segunda divizaun ne’ebé hahú adapta ona matéria téknika husi treinadór.
Jogu entre Nagardjo FC kontra Assalam sei determina ekipa husi Grupu B ne’ebé sei hakat bá faze meiu finál iha Tasa Liga FFTL.
Entretantu, Nagardjo FC rekolla pontu tolu hafoin manán DIT FC 2-1 iha-ne’ebé produtividade golu hanesan ho Assalam FC ne’ebé rekolla pontu tolu husi DIT FC.
Jornalista: Natalino Belo
Editór: Xisto Freitas da Piedade
