DILI, 26 Janeiru 2026 (TATOLI)–Dili Institute of Technology Football Club (DIT FC) derrota 1-2 ho Nagardjo FC iha kompetisaun Tasa Liga Federasaun Futeból Timor-Leste (FFTL) 2025 ne’ebé realiza iha Estádiu Munisipál Dili, Domingu (25/01/2026).
DIT FC lidera uluk golu 1-0 iha minutu 56 liuhusi jogadór Kauda Afo Mah. Maibé, la kle’r de’it, Nagardjo FC responde golu rua hodi finaliza jogu ho skor 1-2.
Golu rua husi ekipa Nagardjo prodús husi jogadór Avarely Sueba iha minutu 71 no liu minutu rua de’it elementu Denilson da Luz konsege aumenta tán golu liuhusi Emmnuel Akeley iha minutu 73.
Notísia relevante: Tasa Liga FFTL 2025, AD SLB impata ho Emanuel FC, DIT derrota 1-2 ho Assalam
Ho rezulta jogu referidu, DIT FC serteja ona eliminadu husi kompetisaun Tasa Liga FFTL 2025 hafoin derrota ona jogu rua hafoin iha jogu dahuluk derrota ho Assalam FC 1-2.
Entretantu, Nagardjo FC no Assalam serteja ona hakat bá faze oitavu finál hafoin ekipa rua rekolla pontu hanesan (tolu), rezultadu husi jogu ida-ida no produtividade golu (+/-1), mezmu ekipa rua sei kontra malu iha jogu ikus ne’ebé tuir órariu sei realiza iha semana-ne’e.
Jornalista: Natalino Belo
Editór: Xisto Freitas da Piedade
