KOVALIMA, 29 Janeiru 2026, ( TATOLI) – Diresaun Transporte no Komunikasaun Munisípiu Kovalima, daudaun ne’e loke oportunidade hodi rejista komunidade atu tuir teste hodi hetan karta kondusaun.
“ Daudaun-ne’e, ita hahú halo rejistu ba sidadaun ne’ebé maka submete sira-nia dokumentu atu trata karta kondusaun. Ami loke oportunidade ba komunidade, durante semana ida nune’e sira bele mai trata karta kondusaun, bainhira uza transporta motorizada no kareta”, Funsionáriu DMTK ,Kovalima , João Cancio Amaral, hato’o ba jornalista-sira iha Bairru Kosta ohin.
Ho nune’e, DMTK rejista provizóriu sidadaun na’in-123 maka submete ona sira-nia dokumentu no sei kontinua atende ba sidadaun sira tanba halo rejistu durante semana ida hodi hein ajenda ba tuir teste eskrita no prátika
Dokumentu ne’ebé presiza uza hodi ba rejistu mak foto kopia kloridu kartaun eleitorál tahan ida, atestadu médiku, foto 3×4 tahan rua, ba ema ne’ebé motor ki’ik uza map kor kinur, kategoria motor boot uza map kor azul, kareta kiik uza map koor mean.
Funsionáriu DMTK ne’e esplika, kona-ba oráriu atu tuir teste eskrita ho prátika seidauk bele fó sai tanba sei foku halo rejista hafoin hotu no relata dadus ba iha nasionál no husi nasionál sira mak sei fo ezame eskrita no prátika .
“Komunidade ne’ebé mak kategória foun tuir teste sei selu $15 no ba sira ne’ebé mak iha ona karta kondusaun kategória iha aumenta sei selu osan $35”, nia afirma.
DMTK mós fó hanoin ba sidadaun ne’ebé mak tuir ona teste, maibé uza karta kondusaun provizóriu iha 2019 to’o 2021 hetan karta kondusaun orijinál tanba ekipa nasionál mai iha munisípiu lori mós mákina atu imprime karta kondusaun hamutuk na’in-1,687 husi númeru ne’e na’in-10-resin foti ona iha nasionál.
Iha fatin hanesan, Komunidade Deoniza Carvalho , sente kontente tanba Diresaun servisu munisipál Transporte no Komunikasaun Kovalima loke ona oportunidade ba komunidade sira atu trata karta kondusaun.
“ Ha’u sente kontente tanba bele loke oportunidade ba ita atubele submete dokumentu, nune’e ita bele tuir teste eskrita no prátika atu ita bele iha karta kondusaun bainhira Polísia pasa revista labele aplika koima”, nia dehan.
Notisia relevante: MTK aloka rihun $185 hodi sosa blanku ba karta kondusaun no livrete
Jornalista: Celestina Teles
Editór: Florencio Miranda Ximenes
