DILI, 29 Janeiru 2026 (TATOLI)–Komunidade Kongregasaun Saleziana Don Bosco (SDB), Kinta ne’e, realiza misa requiem pro defunctis ba Maktoban Padre Énio Romalho Esteves, SDB, ne’ebé hakotu iis liuhusi asidente aéreo iha Wasakentsa, Eukuadór, Amérika Latina, Segunda (26/01/2026).
Amu Provinsiál Salezianu Don Bosco Timor-Leste, Anacleto Guterres Pires, SDB, ne’ebé dirije misa requiem lori komunidade Saleziana tomak nia naran hato’o sentida kondolensia profunda ba família maktoban Padre Énio Esteves ne’ebé entrega oan ba komunidade Saleziana hodi hala’o misaun iha rai-li’ur hanesan bibi-atan ne’ebé hadomi nia sarani iha rai Ekuadór to’o ikus husik mundu bainhira iha viajen atu fó formasaun ba katekista sira.
“Ita laran triste no taridu tanba lakon oan Salezianu ho idade ne’ebé ki’ik. Ita hadomi nia maibe Maromak hadomi liu nia,” Pe. Anacleto hateten iha Igreja Parókia Maria Auxiliadora Komoro, Dili, Kinta (29/01/2025).
Nia relata leitura ba misa requiem pro defunctis ba Maktoban Padre Énio Romalho fó lisaun ba sarani hotu katak Padre Enio Romalho Esteves ninia dedikasaun tomak nu’udár Salezianu, saserdote no misionáriu nune’e mezmu husik ona maluk sira maibé maktoban nia liafuan, ksolok ne’ebé hatudu la lakon husi maluk sira-nia fuan no neon.
“Amu Énio hatene fiar no aprende vokasaun misionária tanba iha família ne’ebé sarani di’ak, vokasaun no fiar maihusi família mak hamosu vokasaun ida-ne’e,” Padre Anacleto Pires akresenta.
Padre Anacleto argumenta, Padre Énio Esteves hili serbí Kristu liuhusi misionáriu tanba hadomi ninia sarani sira iha rai Ekuadór nune’e bainhira ramata misaun no fila-hikas bá Maromak nia kadunan santu, haloot iha ninia fatin misionáriu ne’ebé onra boot ba família tuir Padre seluk Salezianu ne’ebé antes ne’e haloot iha Fatumaka no Lautein.
Entretantu, tuir kronolojia, Padre Énio Esteves, SDB, hala’o misaun misionária Saleziana iha provínsia Marona, Santiago, Eukuadór, iha-ne’ebé Padre Énio Esteves hamutuk ho vítima rua seluk hanesan pilotu Danny Lopes no voluntáriu Roberto Visum hala’o viajen husi Wishin bá illa Wasakentsa hodi halo atividade relijioza ho aviaun marka HC-BAN numéru fight C172, ne’ebé hetan asidente purvolta tuku 06:00 lorokraik oras rai ne’ebá nian, Segunda (26/01/2026).
Biografia
Padre Énio Romalho Esteves, SDB, oan ba datoluk husi maun-alin na’in-hitu, moris iha Aldeia Ara-ara, Postu Administrativu Iliomar, Munisípiu Lautein, iha loron 07 Maiu 1979, husi Aman António Esteves no Inan Rufina Pinto, ne’ebé hala’o estudu Sekundáriu Vokasionál iha Don Bosco Fatumaka no deside hamutuk ho komunidade Saleziana ho idade 23 iha 24 Jullu 2002.
Padre Énio Esteves husi tinan 1986 to’o 1994 hela iha orfonatu komunidade Saleziana Don Bosco, Lospalos, ne’ebé hala’o estudu iha Ensinu Báziku numéru 14 Lulira husi tinan 1987 to’o 1992 no ramata eskola pre-sekundária iha tinan 1994 no kontinua Sekundáriu Tékniku Vokasionál Don Bosco Fatumaka husi tinan 1995 to’o 1998.
Maktoban Padre Énio Esteves, SDB, deside hili dalan Salezianu liuhusi pre-novísiu iha Don Bosco, Fatumaka, hahú tinan 1999 to’o 2000 no simu ordenasaun dahuluk nu’udár frater iha loron 24 Jullu 2004 iha Fatumaka no kontinua sai misionáriu.
Maktoban hala’o estudu Teolojia iha Kolombia no simu ordenasaun iha tinan 2014 no kontinua kedas misaun Saleziana Santu Domingos Sávio iha Bambozia, Ekuadór no asume nu’udár vigáriu, konselleiru, pastór no tezurreiru iha 2014-2017.
Iha tinan 2017 to’o 2020, asume kna’ar misaun Saleziana Santa Maria Imaculada iha Yupi hodi serbí nu’udár diretór, tezurreiru no pastór. Alende ne’e, iha tinan 2023, hetan kna’ar iha Beato Caferino Namumcurá iha Wasakentsa ne’ebé asume pasta pastór no vigáriu iha-ne’ebé mate ho idade 46 no dedikasaun nu’udár Salezianu ho durasaun tinan 23, tinan 11 nu’udár Saserdote no tinan 17 nu’udár misionáriu ajente.
Jornalista: Natalino Belo
Editór: Xisto Freitas da Piedade
