KOVALIMA, 28 JANEIRU 2026 ( TATOLI)-Ministériu Administrasaun Estatál liuhosi Diretora Jerál Toponímia no Organizasaun Urbana, Maria Odete Barros Florindo, kuarta ne’e, entrega tableta haat no relatóriu avaliasaun servisu munisipál ba Autoridade Munisípiu Kovalima.
Husi tableta tolu ne’e, tableta ida, entrega ba Diretora Servisu Munisipál Apoiu Organizasaun Noun Governamentál no Organizasaun Komunitária, Maria de Jesus Perreira no tableta rua entrega ba funsionáriu ne’ebé servisu iha portál munisipál ho inténsaun atu atualiza dadus monografia no Demografia munisipál.
“Ami lori relatóriu mai ne’e husi Gabinete maka hasai atu entrega ba iha prezidente Autoridade munisípiu Kovalima hodi haree rezultadu avaliasaun aliende ne’e mós entrega tableta ba autoridade Kovalima,”Maria Odete Barros Florindo, hateten ba Jornalista sira iha salaun AMC.
Iha sorin seluk, Prezidente Autoridade Munisípiu Kovalima (PAM), Miguel Armada Cardoso, husu ba funsionáriu sira ne’ebé halo jestaun ba portal munisipál ne’e atu atuliza dadus foun kona-bá monografia no demografia ba públiku hodi bele asesu.
“Tableta ne’ebé maka ita boot sira simu oinsá atu fasilita ita-boot atu hala’o servisu hodi atualiza dadus iha portál munisipál tanba ita-boot sira maka bele hala’o servisu nune’e hodi atualiza dadus hotu relasiona kona-bá munisípiu Kovalima,” nia dehan.
Portál munisipál ne’e ninia servisu maka atu atualiza dadus kona-bá demografia, monografia, agrikultura, edukasaun, servisu saúde, Servisu Munisipál Planeamentu Integradu no Dezenvolvimentu (SMPID) no Programa Nasionál Dezenvolvimentu Suku (PNDS) no seluk tan.
Dadus demografia ne’e importante hodi atualiza kona-ba totál populasaun iha suku, postu to’o munisípiu na’in hira maka sei moris no hira maka mate ona, uma lisan sira, rekursu naturál no seluk tan nune’e bele apoiu prosesu dezenvolvimentu munisípiu iha futuru.
Jornalista: Celestina Teles
Editór: Florencio Miranda Ximenes
