DILI, 29 Janeiru 2026 (TATOLI)-Ministériu Edukasaun (ME) loke konkursu públiku ba projetu konstrusaun saladeaula hamutuk 500 ne’ebé sei estabelese iha territóriu, iha fulan-Marsu tinan ne’e.
Ministra Edukasaun, Dulce de Jesus, dehan Governu Dasiak mai ho ninia programa iha infraestrutura eskolár, iha planu atu harii sala de aula 1.550. Bainhira iha tinan 2024, ME laiha projetu foun tanba tenke fó kontinuidade hodi finaliza projetu iha tinan 2023 pur volta saladeaula 279 ne’ebé asina kontratu iha fulan-Setembru no Outubru.
Ministériu fó nia tempu superviziona hodi garante implementasaun, no iha tinan 2025, konstrui ona saladeaula 500-resin, ida-ne’e konta mós apoiu husi doadór sira.
“Entaun, ita hanoin iha 2026 iha tan pur volta saladeaula 500. Daudaun dezeñu no BoQ kompleta hotu ona, hein iha fulan-Marsu bele lansa ona prosesu aprovizionamentu, nune’e projetu sira ne’e bele la’o di’ak liu”, governante hato’o iha ámbitu audiénsia públika ho Parlamentu Nasionál kona-ba Konta Jerál Estadu 2024, ohin.
Ministra rekoñese katak durante implementasaun projetu sira iha dezafiu, tanba prosesu administrativu naruk hodi kumpre ba regra no kestaun seluk tan.
Dulce de Jesus garante katak to’o meadu tinan 2028 bele kompleta saladeaula 1.500 ne’ebé iha ona planu Governu Dasiak nian.
Durante audiénsia ne’e, reprezentante povu sira solisita ba ministériu atu tau atensaun ba infraestrutura eskolár iha terretóriu, tanba kondisaun eskola balun ladi’ak atu halo prosesu ensinu aprendizajen.
Notísia relevante: https://tatoli.tl/2025/11/06/oje-2026-me-esforsu-kria-kondisaun-hodi-garante-edukasaun-neebe-kualidade/
Jornalista: Nelson de Sousa
Editora: Maria Auxiliadora
