Nicodemos Pereira lidera Autoridade Tributária ba períodu tinan haat
DILI, 29 Janeiru 2026 (TATOLI) – Ministra Finansa, Santina Cardoso, akompaña husi Primeiru-Ministru, Xanana Gusmão, fó pose ba Nicodemos dos Reis Pereira, hodi asume kargu nu’udar Komisáriu Autoridade Tributária, ba períodu tinan haat, 2026-2029.
Iha serimómia tomada pose ne’e, Primeiru-Ministru, Xanana Gusmão, husu ba Komisáriu foun atu hala’o knaar ho responsabilidade no intergridade, liuliu iha jestaun rekursu ho di’ak, hodi garante futuru di’ak ba nasaun.
“Tanba ita ko’alia kona-ba konstrusaun la fásil. Ita atu hetan ukun-an, funu lori tinan 24, sira ne’ebé mate la husu buat barak, sira hakarak husu rai ne’e ukun-an atu povu hetan moris di’ak nu’udar rai independente”, Xanana Gusmão hateten iha Ministériu Finansa Aitarak-Laran, ohin.
Nia dehan simu knaar signifika asume mandatu ida-ne’ebé iha responsabilidade boot no hetan konfiansa públika, hodi garante Timor-Leste nia susesu ba futuru. “Ita-nia esforsu mak susesu ba jerasaun foun sira. Bainhira funsionáriu sira halo serbisu ho di’ak, nia benefísiu ne’e ba povu”, hateten.
Xefe Governu afirma katak knaar ne’ebé hetan ne’e uza ho responsabilidade, tanba iha 20 Maiu agora Timor-Leste komemora tinan 24 independénsia. “Hateke ba kotuk to’o mai agora tinan 24 ita ukun-an, ita halo ona saida, no hadi’a ona saida, povu hetan moris di’ak ona ka la’e, ita la’o to’o iha ne’ebé? Atu buat sira ne’e bele akontese, sistema tenke la’o di’ak, tanba sistema la ladi’ak, susar tebes”, Xanana haktenik.
Xefe Ezekutivu akresenta katak Timor-Leste iha Fundu Petrolíferu, kompara ho nasaun sira seluk laiha no kada tinan lolo-liman husu apoiu. “Agora ita tenke foti desizaun ne’ebé di’ak atu hametin ita-nia independénsia ne’e. La’e ema seluk mai aproveita ita. Hametin ita-nia independénsia mak finansia ba ita-nia prioridade sira ne’ebé ita harii ona nu’udar Estadu, tanba ita-nia rikeza petrolíferu fó ona oportunidade ba dezenvolvimentu nian”, nia dehan.
Ministra Finansa, Santina Cardoso, hateten katak tomada pose ba Komisáriu Autoridade Tributária foun bele fó liután knaar ba autoridade no ekipa tomak, atu hala’o nia funsaun sira iha área ne’ebé estratéjika.
“Benvidu ba Nicodemos ne’ebé filafali mai hamutuk ho ekipa tomak Autoridade Tributária nian no mós Ministeriu Finansa nia direjente tomak. Ita-boot sira maka ha’u nia forsa. Ha’u só bele susesu bainhira ita bele forte no serbisu hamutuk, liuliu ho Nicodemos mai hamutuk ho ita, bele halo mudansa”, governante ne’e realsa.
Komisáriu Autoridade Tributária foun, Nicodemos dos Reis Pereira, hateten katak funsionáriu sira husi Autoridade Tributária no Ministériu Finansa iha kompromisu komún atu hametin misaun kona-ba Administrasaun Tributária Timor-Leste nian, hodi administra no hasa’e reseita tributária ho maneira ne’ebé responsavel no transparente tuir lei no regulamentu aplikavel.
Nia dehan prinsípiu ida-ne’e aliña ho polítika Governu no ajenda reforma fiskál no institusionál, liuliu mellora adminstrasaun no sistema tributária hodi hadi’a prestasaun servisu públiku ba kontribuinte sira ho justu, efisiente no efikáz.
“Aproveita oportunidade kmanek ida-ne’e, ha’u hakarak agradese ba Ministra Finansa, Santina Viegas Cardoso, ba konviksaun no konfiansa ne’ebé depozita ona mai ha’u atu lidera Autoridade Tributária. Agradese ua’in liután ba Primeiru-Ministru, Xanana Gusmão, ba ninia apoiu”, nia hato’o.
Lembra katak, Ministra Finansa, Santina Cardoso, aprezenta proposta ba Konsellu Ministru delibera hodi nomeia Nicodemos dos Reis Pereira nu’udar Komisáriu Autoridade Tributária, ho konsiderasaun ba ninia kapasidade téknika ne’ebé hetan rekoñesimentu no esperiénsia profisionál ne’ebé hatudu ona.
Jornalista: Arminda Fonseca
Editora: Maria Auxiliadora
