DILI, 30 Janeiru 2026 (TATOLI) – Primeiru Ministru Austrália Anthony Albanese, anunsia pakote kooperasaun ekonómika ida ba Timor‑Leste kompostu husi millaun $8.2 atu apoia Timor-Leste nia partisipasaun iha Asosiasaun Nasaun sira Sudeste Aziátiku (ASEAN, sigla portugés) no Organizasaun Mundiál Komérsiu no millaun $80 ba programa dezenvolvimentu setór Privadu.
Primeiru Ministru Anthony Albanese konsidera apoia ne’e atu hametin parseria entre Austrália ho Timor-Leste.
“Deklarasaun ne’e maka dahuluk entre ita-nia nasaun rua no hametin ita-nia parseria ekonómika, seguransa no dezenvolvimentu ne’ebé buras daudaun. Parseria maka demonstrasaun ida hosi ami-nia kompromisu fahe ba: rejiaun ida-ne’ebé nakloke, estavel no prósperu; kooperasaun, konsultasaun no respeitu malu ba soberania nasionál; apoia Timor-Leste nia prioridade sira harii nasaun nian; no hametin ligasaun komunidade nian,” rerefe nota imprensa husi Gabinete Primeiru Ministru Austrália nian, kinta ne’e.
Pakote Kooperasaun Ekonómika ida ba Timor‑Leste, ne’ebé inklui tán millaun $8.2 atu apoia Timor-Leste nia partisipasaun iha Asosiasaun Nasaun Sudeste Aziátiku (ASEAN, sigla portugés) no Organizasaun Mundiál Komérsiu.
Pakote ne’e inklui Programa Dezenvolvimentu Setór Privadu millaun $80 hodi apoia Timor-Leste nia diversifikasaun ekonómika no kreximentu setór privadu liuhosi asesu ba kréditu, servisu negósiu no apoiu ba marketing.
Nune’e mós, Primeiru-Ministru anunsia inisiativa dezenvolvimentu umanu foun ida ho osan millaun $220 hodi apoia prestasaun servisu saúde, edukasaun no defisiénsia nian ne’ebé inkluzivu no ho kualidade aas iha Timor-Leste laran tomak.
“Ida-ne’e marka era foun ida ba kooperasaun entre ita-nia nasaun sira. Ida-ne’e reflete ami nia amizade ne’ebé kleur ona no hatuur ami-nia vizaun ne’ebé fahe ba futuru. Hanesan onra ida atu vizita Timor-Leste iha momentu importante ida-ne’e iha nia istória hafoin nia adezaun ba ASEAN,” Sitasaun sira husi Primeiru Ministru Albanese bainhira vizita Timor-Leste.
Nia dehan, Austrália sei kontinua serbisu hamutuk ho Timor-Leste hodi garante katak ida-ne’e fó dame, estabilidade, no prosperidade ba povu Timoroan no ba rejiaun.
Notisia relevante:
TATOLI
