Seidauk iha ema ida substitui Vise-Ministra Finansa nia fatin
DILI, 29 Janeiru 2026 (TATOLI)–Vise-Ministra Finansa, Felícia Carvalho, hatama ona karta rezignasaun ba Konsellu Ministru iha semana hira ba kotuk, maibé to’o ohin loron Xefe Governu seidauk iha hanoin atu buka ema ruma substitui nia fatin.
“Nia sai tanba saida ne’e ba husu ba nia. Ha’u mak hasai entaun husu mai ha’u. Nia mak rezigna-an entaun husu ba nia,” PM Xanana hateten ba jornalista sira iha Palásiu Prezidensiál Nicolau Lobato, Bairru Pite. Ohin.
Kona-ba pesoál ne’ebé atu substitui Felícia Carvalho nia fatin, Xanana Gusmão hateten, sei foku uluk ba Oekusi tanba ida-ne’e importante liu.
“Agora ami sei foku uluk ba RAEOA tanba ida-ne’e impirtante liu, atu substitui nia fatin sei to’o tempu,” nia dehan.
Rezignasaun Vise-Ministra Finansa
Kona-ba motivu loloos husi Vise-Ministra Finansa nia rezignasaun ne’e to’o agora seidauk hatene, tanba TATOLI tenta manda mensajen liuhusi WhatsApp ba Felicia Carvalho maibé haree de’it no la responde.
Simu pose nu’udar Vise-Ministra Finansa
Felícia Claudinanda da Cruz Carvalho simu pose husi Prezidente Repúblika, José Ramos-Horta, iha loron 15 fulan-Setembru tinan 2023, hanesan Vise-Ministra Finansa foun Governu Konstitusionál da-9 nian, iha serimónia ida-ne’ebé realiza iha Palásiu Prezidensiál Nicolau Lobato, Dili.
Felícia Carvalho troka Hélder Lopes, ne’ebé asume pozisaun hanesan Governadór Banku Sentrál Timor-Leste (BCTL, sigla lian portugés) iha loron 13 fulan-setembru liubá.
Antes ne’e, Felícia Carvalho okupa kargu hanesan asesora eis-Ministra Finansa, Emília Pires nian, no hanesan responsável ba Unidade Jestaun Parseirus ba Dezenvolvimentu Ministériu Finansa nian. Foin daudaun ne’e, nia dezempeña funsaun asesoria iha Ministériu Solidariedade Sosiál no Inkluzaun.
Hafoin simu pose, Felícia Carvalho, hateten nu’udar “onra boot ida hodi asume kargu hanesan Vise-Ministra Finansas” no agradese “ba konfiansa ne’ebé fó husi Prezidente Repúblika no Primeiru-Ministru”.
Vise-Ministra ne’e kompromete mós atu “serbisu hamutuk ho ekipa tomak iha Ministériu Finansas hodi dezempeña serbisu ida ne’ebé di’ak ba povu”.
Primeiru-Ministru, Xanana Gusmão, justifika eskolla Felícia Carvalho bazeia ba ninia koñesimentu kona-ba setór finanseiru no ninia dezempeñu iha Ministériu Finansa.
Jornalista : Hortencio Sanchez
Editor : Cancio Ximenes
