DILI, 30 Janeiru 2026 (TATOLI)—Embaixadór foun Alemaña mai Timor-Leste rezidente iha Jakarta-Indonézia, Ralf Beste, sesta ne’e, entrega karta kredensiál ba Prezidente Repúblika José Ramos-Horta antes hala’o misaun diplomata iha nasaun ne’e.
Bainhira simu karta kredensiál husi Embaixadór ne’e, Prezidente Ramos-Horta fó bem-vindu no afirma katak importánsia kontínua husi relasaun bilaterál entre nasaun rua.
“Parseria ne’ebé evolui entre Timor-Leste no Alemaña, ne’ebé foka liu ba hakbiit ita-nia povu sira liuhusi abilidade no oportunidade, loke kapítulu foun ida-ne’ebé promisór. Ha’u iha konfiansa katak iha Embaixadór Beste nia lideransa, ita-nia kooperasaun sei kle’an liután, hodi lori benefísiu mútuo ba ita-nia nasaun sira,” Ramos-Horta hateten iha nia diskursu.
Nia dehan, Timor-Leste no Alemaña estabelese relasaun diplomátiku iha loron 20 Maiu 2002. Durante dékada rua resin, Alemaña sai hanesan parseiru fundamentál ida, fó apoiu ba dezenvolvimentu Timor-Leste nian liuhosi kooperasaun bilaterál ne’ebé signifikativa iha área sira hanesan konsolidasaun dame, dezenvolvimentu rurál, empregu juventude no infraestrutura, inklui fornesimentu ró-ahi “Berlin-Nakroma”.
Tuir konkluzaun hosi kooperasaun dezenvolvimentu bilaterál iha 2023, parseria ne’e evolui ona ho dinámiku. Vizita Estadu istórika ida husi Prezidente Ramos-Horta ba Alemaña, iha juñu 2023, konsolida tiha ona foku foun ida kona-ba mobilidade laborál no kapasitasaun ho Alemaña konkorda atu simu traballadór timoroan sira no apoia inisiativa sira formasaun profisionál nian.
Prezidente Ramos-Horta manifesta nia konfiansa katak Embaixadór Ralf Beste nia esperiénsia ne’ebé kle’an sei kontribui maka’as hodi aprofunda relasaun bilaterál entre Timor-Leste no Alemaña.
Embaixadór Ralf Beste mak diplomata ida ne’ebé iha esperiénsia ne’ebé lori mai nia kargu kareira notável ida, ne’ebé kombina jornalizmu, servisu públiku no lideransa diplomátika.
Antes ne’e, nia serbisu nu’udar korespondente ba publikasaun prinsipál sira iha Alemaña, inklui Ruhr Nachrichten no Berliner Zeitung, no pasa tinan sanulu-resin-tolu nu’udar korespondente ba revista Der Spiegel iha Berlin.
Iha nia tranzisaun ba funsaun públika, nia desempeña funsaun nu’udar porta-vós ba Ministériu Finansa Rhineland-Palatinate nian.
Embaixadór Beste mós kaer kargu altu nível iha Ministériu Negósiu Estranjeiru Repúblika Federál Alemaña nian, iha Berlin, inklui Diretór Komunikasaun Estratéjiku no Xefe Ekipa Planeamentu Polítiku nian.
Nia hala’o knaar nu’udar Embaixadór Alemaña nian ba Repúblika Áustria hahú hosi tinan 2019, molok nia hala’o nia knaar foin lalais ne’e nu’udar Diretór-Jerál ba Kultura no Sosiedade iha Ministériu Negósiu Estranjeiru Repúblika Federál Alemaña nian.
Jornalista : Hortencio Sanchez
Editór : Cancio Ximenes
