DILI, 30 Janeiru 2026 (TATOLI)–Embaixadór Austria ba Indonézia no Timor-Leste, Thomas Loidl, sesta ne’e, hasoru malu no despede Prezidente Repúblika, José Ramos-Horta, tanba hakotu ona nia misaun diplomata iha Timor-Leste.
“Hanesan onra boot ida no ksolok boot ida atu reprezenta ha’u-nia nasaun iha Timor-Lest, agora ha’u-nia mandatu termina ona no ohin mai despede ho Prezidente Ramos-Horta. Hanesan onra boot ida atu diskute asuntu bilaterál sira entre Austria no Timor-Leste no mós asuntu internasionál sira, ho Prezidente Repúblika,” Embaixadór Thomas Loidl hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Thomas Loidl konsidera katak, relasaun sira entre Timor-Leste ho Áustria hametin maka’as, hodi destaka progresu konkretu sira iha koperasaun bilaterál.
“Relasaun sai metin liutan. Tinan rua liu ba ita loke konsuladu iha Dili no ita konsege integra Ensinu Superiór Timorense iha enkuadramentu kooperasaun akademiku ho universidade sira iha rejiaun ASEAN,” nia hateten.
Tuir embaixadór, koperasaun ne’e kria oportunidade ba estudante timoroan sira, liuliu iha asesu ba bolsa estudu, hodi hatutan katak iha semana balun nia laran, estudante timoroan sira sei halo viajen ba kapitál austríaku, Viena, hodi tuir kursu sira iha Akademia Diplomátika. Lasu sira entre nasaun rua ne’e hametin ona iha nível kulturál, kulturál no ekonómiku.
Diplomata ne’e fó sai mós katak durante enkontru ho Prezidente Ramos-Horta, aborda kestaun internasionál oioin, inklui relasaun rejionál liuliu relasaun di’ak entre Timor-Leste ho Indonézia, nune’e mós ho nia viziñu boot iha súl, Austrália, refere mós ba vizita foin lalais ne’e husi Primeiru-Ministru australianu, Anthony Albanese, vizita Dili.
Entre tópiku sira-ne’ebé ko’alia, Thomas Loidl destaka Timor-Leste nia adezaun ba Asosiasaun Nasaun Sudeste Aziátiku (ASEAN), ne’ebé nia deskreve hanesan susesu boot ida ba nasaun no ba povu timoroan tomak.
Atu taka, Thomas Loidl agradese ba Prezidente Repúblika, Governu no povu timoroan ba sira-nia apoiu no ospitalidade durante nia mandatu.
“Ha’u lori Timor-Leste iha ha’u-nia fuan no hein atu fila fali iha futuru, karik la’ós nu’udar embaixadór, maibé nu’udar turista,” nia dehan.
Jornalista : Hortencio Sanchez
Editór : Cancio Ximenes
