DILI, 30 Janeiru 2026 (TATOLI)–Estudante sira husi Eskola Portugeza Dili (EPD), sesta ne’e, aprezenta múzika tradisionál “Cantar as Janeiras” iha Palásiu Prezidensiál, hanesan tradisaun portugés hodi manifesta kulturál ida-ne’ebé asosiadu ho dezeju Tinan Foun nian.
Aprezentasaun ne’ebé marka ho momentu sira dansa no knananuk nian, ho objetivu atu prezerva no divulga tradisaun portugés ida-ne’ebé populár.
Inisiativa ne’e promove iha asaun konjunta ida entre Embaixada Portugál iha Timor-Leste no EPD, ne’ebé envolve estudante no profesór sira husi estabelesimentu ensinu ida-ne’e.
Iha resepsaun ne’e, Prezidente Repúblika hato’o surpreza no entuziasmu ba aprezentasaun ne’e, hodi hateten katak nia la lembra ona tradisaun ne’e ho di’ak.
“Ha’u haluha kompletamente kona-ba Knananuk Tinan Foun nian maibé tradisaun furak ida, maibé kulturál sira hanesan ne’e tenke mantein nafatin, knanauk sira-ne’e furak tebes, tanba kantiku ne’e hala’o iha aldeia sira, la’ós iha sidade, grupu korál sira ba ema-nia uma, ba bairru sira, kanta hanesan deseza ba tinan foun di’ak, ida-ne’e tradisaun portugál sira-nian,” Ramos-Horta hateten ba joranlsita sira hafoin ramata atividade ne’e.
Xefe Estadu mós konsidera katak inisiativa ne’e bele inspira prátika kulturál foun iha rai-laran.
“Ami bele adapta ida-ne’e no halo hanesan tradisaun ida iha Dili, agradese ba Eskola Portugeza, profesór sira no estudante sira-ne’ebé nia deskreve hanesan kantór boot no artista boot. Agradese tanba sira hili Palásiu Prezidensiál hodi aprezenta sira-nia múzika sira,” Horta hateten.
Ho lian relaxadu, José Ramos-Horta elojia estudante sira-nia kompromisu no piada kona-ba posibilidade intersede ho diresaun eskola nian.
Prezidente mós aproveita atu hanoin hikas fali tradisaun sira seluk ne’ebé durante ne’e Prezidénsia Repúblika valoriza, hodi destaka prezépiu Natál nian.
Nia esplika, prátika ida-ne’e tuun ona iha tinan barak nia laran, maibé hetan rekuperasaun husi inisiativa prezidensiál.
“Ha’u deside hamoris fali tradisaun ida-ne’e no agora hetan forsa, ho kualidade barak liu duke iha pasadu, ne’e hanesan buat ida-ne’ebé úniku iha Timor-Leste tanba dalan kriativu no vizivel ne’ebé prezépiu sira tau iha estrada no foho sira,” nia dehan.
Biban ne’e, Embaixadór Portugál iha Timor-Leste, Duarte Alves, esplika signifikadu husi tradisaun ne’ebé aprezenta hosi estudante sira, hodi esklarese katak múzika ‘Cantar as Janeiras’ hananu iha Portugál durante fulan-Janeiru, hanesan dalan ida hodi marka inísiu tinan foun nian.
“Ida-ne’e liuliu tradisaun rurál ida, iha ne’ebé grupu labarik sira ka joven sira la’o husi uma ba uma hodi kanta hodi hato’o tinan foun ida-ne’ebé ksolok,” embaixadór ne’e hateten.
Tuir diplomata ne’e hateten, aprezentasaun sira-ne’e hala’o ho família riku no kiak, instituisaun sosiál sira, igreja no sentru komunitáriu sira, ho objetivu atu promove konvivialidade, kultura no deseju ba prosperidade.
“Ne’e mak ohin ami hakarak halo iha ne’e, kumprimenta Prezidente Repúblika no liuhusi nia, hato’o ksolok tinan foun ba timoroan tomak,” nia dehan.
Jornalista : Hortencio Sanchez
Editór : Cancio Ximenes
