DILI, 30 Janeiru 2026 (TATOLI) – Relasiona ho kazu dengue ne’ebé aumenta no halo overload iha Ospitál Nasionál Guido Valadares (HNGV, sigla portugés) maka Ministériu Saúde no HNGV realiza enkontru koordenasaun hodi transfere pasiente dengue bá Kuarentena Tasi-Tolu, Dili.
Diretór-Jerál Servisu Kooporativu iha Ministériu Saúde, Narcísio Fernandes, informa katak tranferénsia pasiente ne’e sedu liu semana ida-ne’e nia laran, tanba ospitál Bidau laiha ona espasu atu akumula pasiente ho númeru barak.
“Ministériu Saúde ho Ospitál Nasionál halo diskusaun téknika oinsá mobiliza rekursu, liuliu médiku, enfermeiru, parteira, no tekniku aliadu sira atu apoia, nune’e bele responde di’ak liu ba pasiente sira ne’ebé sofre dengue atu transfere bá Kuarentena Tasi-Tolu”, Narcísio Fernandes hateten, ohin.
Tuir nia, opsaun transferénsia pasiente bá Tasi-Tolu ne’e di’ak, tanba MS lakohi pasiente sira internadu iha HNGV balun tuur de’it iha korridor no kadeira, tanba kama emerjénsia ne’ebé la sufisiente.
Diretór-Ezekutivu HNGV, Nuno Vital, hateten atu trasfere pasiente ba Kuarentena Tasi-Tolu iha ona diskusaun hodi halo avaliasaun nivel klíniku. “Área klínika sei halo ezersísiu ida ba fatin Tasi-Tolu, tanba kazu dengue ne’e tenke kuidadu ho di’ak. Rekursu ne’ebé sei haruka bá iha ne’ebá tenke konsentra de’it iha fatin ida, nune’e ospitál hala’o nafatin nia pozisaun ho di’ak”, nia dehan.
Médiku ne’ebé, tuir planu, Ministériu Saúde no HNGV atu destaka bá Kuarentena Tasi-Tolu besik 400.
Notísia relevante: HNGV rekoñese dengue overload, hahú transfere pasiente bá Lahane
Jornalista: Arminda Fonseca
Editora: Maria Auxiliadora
