DILI, 31 Janeiru 2026 (TATOLI)-Komunidade afetada uma-kain hamutuk 11 ba alargamentu estrada iha parte Auhun no Bekusi Kraik iha Bekora kontinua ezije Governu atu fó tratamentu dignu.
Porta Voz, Vasco Soares, afirma sira-nia parte la kontra dezenvolvimentu maibé kontra injustisa ne’ebé hatudu, tanba sira-nia rai privadu no iha prosesu ne’e besik tinan ida ona agora sei iha hela prosesu diskusaun téknika husi parte terras no propriedade, maibé realidade iha loron 23 Janeiru liubá Governu ho forsa mai foti obrigatóriu komunidade nia rai no uza mákina pezada estraga komunidade ninia propriedade sein iha indemnizasaun no laiha informasaun ruma ba atuasaun referida.
Governu nia obrigasaun atu tuir Lei Expropriasaun ba Utilidade Públika indemnizasaun justa, adekuadu ba tratamentu dignu.
“Ami komunidade afetadu sente injustisa ho forsa Estadu uza sein respeita povu nia direitu hanesan na’in ba rai, loloos Estadu ne’e mak projete povu nia direitu,” nia hato’o liuhusi konferénsia imprensa ba jornalista sira iha Bekora, sábadu ne’e.
Nia kestiona mós prezensa membru polísia balun ne’ebé akompaña halo atendimentu la profisionál hodi diskute malu ho komunidade impoin fali regra.
“Liuhusi ne’e, ami komunidade afetada ho asaun pasífiku hato’o expresaun no sentimentu, ho ezijénsia hakarak solusaun legál no indemnizasaun justu no adekuadu tuir Lei no diálogu ho komunidade tenke transparánsia,” komunidade ne’e hato’o.
Nune’e mós, Adelina de Jesus, reforsa bainhira solusaun ne’e laiha mak sei lori prosesu ne’e ba tribunál hodi buka justisa ne’ebé loloos. Hodi dehan, komunidade afetada agora daudaun la asesu bee-moos semana rua ona tanba konstrusaun sobu mós kanalizasaun ne’ebé iha, loloos entidade kompetente presiza iha koordenasaun di’ak hodi labele fó impaktu ba komunidade.
Koordenadór Nasionál Rede ba Rai, Pedrito Viera, husu ba ezekutivu atu kumpri Lei Expropriasaun ba Utilidade Públika hodi buka solusaun ho komunidade afetadu sira.
Notísia relevante:https://tatoli.tl/2026/01/23/foto-atual-governu-mobiliza-ekipamentu-pezadu-sobu-ponte-maufelu-dili/
Jornalista: Nelson de Sousa
Editór: Rafael Ximenes de A. Belo
