DILI, 02 Fevereiru 2026 (TATOLI)–Empreza lokál Incanto Grup hamutuk ho empreza husi nasaun Singapura Kennet and Co grup, segunda ne’e, hasoru malu ho Prezidente Repúblika José Ramos-Horta hodi atualiza serbisu kooperasaun ne’ebé parte rua (2) hala’o ona durante ne’e hodi kapasita timoroan sira iha área oioin.
“Ami husi Incanto Grup no Kennet Co mai hasoru Prezidente Repúblika, ho objetivu atu relata no haree ami-nia kooperasaun ne’ebé atu dezenvolve rekursu umanu iha Timor-Leste,” Adjuntu Diretór Ezekutivu Incanto grup, Manuel Vong, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, Incanto ho Kennet halo kooperasaun kle’ur ona ho nia foku ba liu dezenvolvimentu rekursu umanu hodi fó oportunidade ba timoroan sira-ne’ebé ramata ona estudu iha nivel Universitariu iha área ospitalidad, turizmu no seluk tan atu hasa’e sira-nia abilidade.
“Ida-ne’e kontribuisaun ida husi setór privadu liuhusi kooperasaun ida bolu Business to Business, atu kapasita ita-nia timoroan sira ne’ebé remata ona sira nia estudu iha Universitariu sira liuliu área ospitalidade no turizmu, atu bele ba serbisu iha Singapura,” nia dehan.
Nia esplika, empreza Kennet Co hanesan kompañia ida-ne’ebé hala’o nia kna’ar iha setór indústria no turizmu iha Singapura, interesenate tebes atu rekruta timoroan sira hodi ba serbisu iha empreza ne’e iha área ospitalidade no turizmu.
“Entaun Incanto halo ona kooperasaun ho empreza ne’e. Agora daudaun Incanto prepara hela joven lubuk ida, sira-ne’e tuir uluk formasaun iha Incanto. Bainhira finaliza sira-nia formasaun mak tuir tan teste liu, foin bele ba serbisu iha Singapura,” nia hateten.
Iha parte seluk, iha tinan 2029, Timor-Leste sei sai uma-na’in ba simeira ASEAN nian, ho nune’e mak Incanto iha hanoin ne’ebé di’ak hodi prepara ona timoroan sira atu nune’e Governu presiza atu apoiu ba serbisu hotu bainhira Timor-Leste sai uma-na’in, iha ona rekursu ne’ebé naton.
Durante enkontru, Prezidente Repúblika José Ramos-Horta fó apoiu másimu ba empreza rua (2) ne’e atu serbisu hamutuk hodi tulun timoroan sira liuliu iha dezenvolvimentu kapitál umanu.
Husi kooperasaun ne’ebé Incanto ho Kennet Co halo, konsege haruka ona timoroan na’in-rua (2) ba serbisu iha Singapura ho saláriu boot tebes kada fulan simu rihun 30 moeda Singapura nian.
Notísia Relevante: INCANTO despede traballadór timoroan na’in-rua ba servisu iha Singapura
Jornalista : Hortencio Sanchez
Editór : Cancio Ximenes
