DILI, 02 Fevereiru 2026 (TATOLI)—Ministra Edukasaun, Dulce de Jesus hateten Ministériu Edukasaun (ME) seidauk iha diskusaun ida kona-ba rekomendasaun husi Timor-Leste Coalition for Education (TLCE), atu entrega programa merenda eskolar ba Ministériu Saúde (MS) atu jere nutrisaun ba estudante sira.
“Ita-boot sira hatene katak merenda eskolár muda ona husi Ministériu Edukasaun ba Ministériu Administrasaun Estatál. Ita seidauk iha diskusaun ba rekomendasaunida-ne’e, ” Ministra Dulce ba jornalista sira iha nia kna’ar fatin, Vila-Verde, Segunda ne’e.
Antes ne’e, Diretór Ezekutivu TLCE, José Monteiro dehan se merenda eskolár ne’e atu ajuda nutrisaun ba labarik sira, entrega merenda eskolár ba Ministériu Saúde hodi jere.
Nia akresenta objetivu husi merenda eskolár ne’e atu hadi’a nutrisaun labarik sira-nian, tanba ne’e fó asuntu nutrisaun ba Ministériu Saúde atubele rekruta graduadu nutrisaun sira bá servisu.
“Karik ita sériu atu hadi’ak má-nutrisaun ba labarik sira-nian, mak mekanizmu ida de’it entrega progroma merenda eskolár ba ministériu saúde, depoiz mak koopera ho Ministériu Edukasaun,” nia subliña.
Tuir nia, merenda eskolár la’ós Ministériu Administrasaun Estatál nia kompeténsia, tanba sira-nia kompeténsia mak organiza komunidade tau labele okupa resintu eskola no espasu públiku sira.
Jornalista: Osória Marques
Editór: Xisto Freitas da Piedade
