DILI, 02 Fevereiru 2026 (TATOLI)—Ministru Obra Públik (MOP), Samuel Marçal, orienta ona ekipa téknika hodi halo levantamentu dadus no taka provizóriu ba kondisaun trotoar ne’ebé nakfera no kuak iha Jardin Palásiu Governu nia oin.
Nia hateten, kondisaun ne’e horisehik Primeiru-Ministru haree ona no MOP seidauk bele hadi’a tanba sei iha hela planu atu konstrui Sentru Konvensaun Internasionál, entaun sei taka provizóriu de’it ba trotoar ne’ebé kuak ne’e.
“Nune’e to’o halo konstrusaun ICC mak ita foin hadi’a dala ida trotoar refere. Se lae, ita hadi’a tiha sobu fali ne’e gasta osan Estadu nian de’it,” Ministru Samuel informa ba Agência Tatoli iha nia kna’ar fatin, ohin.
Xefe Koordenadór Laboratóriu Enjinária Sivíl, Jony Rodrigues Varela, hataten sira halo ona levantamentu dadus ba trotoar ne’ebé nakfera iha Palásiu Governu nia oin maibé ami desizaun husi superiór.
“Desizaun hotu husi superiór, ami foti de’it dadus, enkuantu desizaun atu reabilita ne’e la’ós ona ami-nia kompeténsia. Nune’e, ami só hatene mak tékniku maibé kona-ba administrativu ne’e lae,” nia dehan.
Nia informa, bazeia ba sira-nia idenrifikasaun kauza husi problema ne’e mak trotoar ne’e konstrui dezde tempu portugés nia tempu, entaun labele garante ona ninia kualidade no husi parte okos kuak ne’e tanba laloran (ondas) tasi baku maka’as.
Jornalista : Alexandra da Costa
Editór : Cancio Ximenes
