Administradór Maucatar husu konstrui armazein produtu lokál iha Kovalima
KOVALIMA, 03 Fevereiru 2026 (TATOLI)– Administradór Postu Administrativu Maucatar, Munisípiu Kovalima, Laurentino de Jesus, husu atu konstrui armazein atu rai produtu lokál iha Kovalima.
“Ita presiza konstrui armazein ho intensaun atu identifika produtu lokál hanesan hare kulit hodi rai iha armazein, nune’e konsumidór sira atu sosa produtu lokál hanesan foos rai iha de’it armazein,” Administradór Postu Maucatar, Laurentino de Jesus, hato’o , iha Salaun AMC.
Bazeia ba dadus produsaun hare-kulit iha 2025 ne’e sa’e maka’as , nune’e presiza tau hamutuk iha armazein hodi hafasil ema sosa no bele fornese ba implementasaun programa merenda eskolár.
“Ita presiza tau hamutuk populasaun nia produsaun hanesan hare kulit, nune’e ema bele sosa hanesan mós produtu ortikultura presiza identifika ida-ne’e mak prodús modo maka’as , nune’e labarik sira han modo tahan ho ijiene iha programa merenda eskolár. Tanba presiza evita uza produtu importasaun hodi hatama ba programa merenda referidu,” nia afirma.
Kovalima hanesan Munisípiu ne’ebé potensiál ba hasa’e produsaun komuditi hare-kulit husi postu administrativu haat hanesan iha tinan 2025 atinje tonelada 3.013.
Produsaun hare-kulit sa’e makaas, tanba agrikultór sira halai natar iha 2025 ho ektare 2,785 ne’ebé mai husi postu administrativu Suai natar ektare hamutuk 636, Zumalai ektare 2080,Tilomar ektare 11 no Fatumea ektare 58. Ho totál natar ektare 2,785 kada ektare agrikultór sira hasa’e produsaun natar tonelada 3,5, nune’e husi postu administrativu haat ne’e produsaun komoditi hare kulit hamutuk tonelada 3,13.
Jornalista: Celestina Teles
Editór: Florencio Miranda Ximenes
