OEKUSI, 03 Fevereiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Komérsiu no Indústria, tersa ohin, halo lansamentu presu foos barratu, ho presu kilograma-20 dolár $10 ba saka ida alvu ba komunidade kbiit-laek sira.
Lansamentu dahuluk presu foos barratu ne’e, ba fatin tolu, iha sub-rejiaun Oésilo hala’o iha aldeia Tumin suku Bobometo, sub-rejiaun Nítibe hala’o iha suku Usitaku no sub-rejiaun Pante Makasar hala’o iha suku Taiboko no sei kontinua ba sub-rejiaun Pássabe.
“Oekusi hanesan enklave, kuandu tempu udan, mota sira nakonu, laloran tasi sa’e maka’as, afeta ba fornesedór nesesidade bázika sira iha merkadu, depois udan maka’as, agrikultór sira mós seidauk kolleta, entaun presu sasán iha merkadu mós aumenta sa’e. Tan ne’e, Governu presiza intervensaun merkadu, hodi fornese foos ho presu barratu, saka ida nia folin dolár $10, ba de’it inan-aman sira-ne’ebé kbiit-laek duni,” nia hateten iha seremónia lansamentu hala’o iha iha suku Bobometo, ohin.
Notísia relevante:SEPS apoia foos 500 ba suku 20 iha Oekusi
Autoridade másima RAEOA ne’e, apela implementasaun presu foos barratu ne’e, alvu ba agrikultór ne’ebé laiha ona kbiit atu kaer serbisu todan no limita negosiante inklui funsionáriu públiku, no husu atu labele fa’an tutan.
“La’ós diskrimina maibé foos ne’e ba de’it inan-aman sira-ne’ebé laiha forsa, no sira-ne’ebé loja ka funsionáriu sei labele asesu foos ne’e. Ne’ebé ami espera, inan-aman sira utiliza didi’ak ai-han sira-ne’e, labele fa’an tutan hodi aumenta presu, tanba Governu hatene tempu udan hanesan, susar tebes atu asesu ba merkadu hodi hetan presu justu hanesan ne’e,” nia apela.
Iha fatin hanesan, Diretór Diresaun Rejionál Komérsiu no Indústria, Orlando Quelo, konfirma, intervensaun presu barratu ne’e, fazeadamente sei kobre hotu suku 20 iha Oekusi, tanba autoridade RAEOA prepara estoke foos tonelada tolu-resin iha armazenamentu Sentru Lojístika Rejionál.
“Ohin ita lansa dahuluk ba fatin tolu ho foos saka 600, iha Oésilo ita hahú uluk iha aldeia Tumin suku Bobometo, iha Nítibe lansa dahuluk iha suku Usitaku no iha Pante Makasar lansa dahuluk iha suku Taiboko, ne’ebé aban ba oin ekipa sei kontinua ba Pássabe no suku seluk to’o kobre suku 20 hotu, tanba foos ita prepara tonelada tolu-resin, kada saka ida nia presu dolár $10, kilograma 20,” nia hateten.
Jacinta Cono nu’udar benefisiáriu husi aldeia Tumin suku Bobometo, agradese ba Governu tanba bele fa’an foos ho presu barratu kompara ho folin merkadu kilograma 20 saka ida nia presu dolár $12,50 sentavu.
“Governu hanoin ami tanba presu ne’e di’ak, baibain ami hola iha merkadu saka ida nia folin dolár $12,50 sentavu, maibé ohin dolár $10 de’it, ne’ebé ami sente kontente tanba agora tempu udan, mota sira nakonu susar tebes atu ba merkadu hodi hetan foos ho folin hanesan ne’e,” nia orgullu.
Notísia relevante:Problema irrigasaun iha Kailaku prejudika produsaun hare agrikultór sira-nian
Jornalista: Abílio Elo Nini
Editór: Rafael Ximenes de A. Belo
