DILI, 19 Fevereiru 2026 (TATOLI)—Empreza husi Indonézia PT Amythas konklui ona dezeñu foun ba konstrusaun edifísiu andar tolu Rádiu Televizaun Timor-Leste, Empreza Públika (RTTL, E.P) iha Kaikoli.
“Ohin ha’u husu ba sira UNDP, Fulan-Marsu agora purtantu halo ona lansamentu ba konkursu. Dezeñu hotu ona,” Sekretáriu Estadu Komunikasaun Sosiál, Expedito Dias Ximenes, informa ba jornalista sira iha salaun RTTL , E.P, Kaikoli, Kinta ne’e.
Notísia relevante : SEKOMS, Embaixada Japaun no PNUD diskute dezeñu foun ba projetu edifísiu RTTL
Governante ne’e dehan, alokasaun orsamentu ba konstrusaun ne’e la hanesan uluk tanba iha redusaun oituan tanba empreza ne’ebé antes ne’e toma konta ba obra ne’e uza ona balun.
“Orsamentu la mantein tanba uluk ida halo ne’e uza tiha balun,” nia akresenta.
Aleinde ne’e, bazeia ba estudu hatudu rai fatin konstrusaun iha Kaikoli ladún favorável atu harii edifísiu ho andar barak.
“Rai ne’e labele tanba bee, tahu dodok, entaun edifísiu ne’e labele iha andar barak se lae nia halai oituan ba kraik, tanba ne’e mak tékniku sira haree katak presiza hamenus husi haat ba tolu,” Sekretáriu Estadu hato’o.
Jornalista : Natalino Costa
Editora : Julia Chatarina
