DILI, 19 Fevereiru 2026 (TATOLI)–Sekretáriu Estadu Komunikasaun Sosiál, Expedito Dias Ximenes, hateten, empreza Globál finaliza ona konstrusaun torre Rádiu Televizaun Timor-Leste, Empreza Públika (RTTL, E.P) iha munisípiu tolu hanesan foho Laline Lospalos (Lautein), Bobonaru no iha área Flexia (Ainaru).
“Tore tolu ne’e kompañia halo hotu ona pursentu 100. Purtantu torre ne’e halo hotu tenke instala, ne’ebé agora ne’e torre rua mak atu instala ekipamentu,” Sekretáriu Estadu Expedito hateten ba Jornalista sira hafoin partisipa iha serimónia pose ba Prezidente foun RTTL, E.P, Rosário da Graça Maia, ne’ebé hala’o iha edifísiu sentrál, Kaikoli, Kinta ne’e.
Notísia relevante : Prezidente foun RTTL, E.P Rosário da Graça sei aposta ba prioridade tolu durante mandatu
Nia dehan, Governu nia planu 2025 to’o 2028 sei harii torre hamutuk 12 ba RTTL, E.P. Nune’e, iha tinan 2023 harii torre tolu no iha tinan 2025 deside torre rua tan, ida iha Iliomar Lautein no Lalimlau iha Ermera, maibé iha torre tolu mak prontu ona, enkuantu rua mak iha hela prosesu konstrusaun.
“Ne’ebé tinan ne’e ita planu harii torre lima ba iha RTTL, tolu mak kompañia finaliza ona. No ba orsamentu tinan ida-ne’e ita orsamenta ona sei hola ekipamentu hodi halo instalasaun uluk ba torre rua, ita sei husu tan iha orsamentu tinan oin hodi kompleta instalasaun ba torre tolu ne’e,” nia informa.
Governante ne’e mós relata, Sekretaria Estadu Komunikasaun Sosiál (SEKOMS) iha planu atu harii tan torre hitu iha tinan 2027 no 2028, tanba tuir planu ba RTTL, E.P, iha tinan 2025 to’o 2028 tenke iha torre 12.
“Ita sei husu tan orsamentu iha tinan oin 2027 para konstrui tan torre haat no iha tinan 2028 ita konstrui tan torre tolu,” nia katak.
Governante ne’e esplika, torre ida bazeia ba tékniku sira ne’ebé halo estudu ne’e iha $300.000-resin, karik tore tolu ne’e millaun $1-resin.
“Bazeia ba tékniku sira-nia estudu, katak harii tore ida ho osan $300.000-resin, ita sei halo tan torre hitu tuir estudu viabilidade hala’o tiha ona. Ne’e atu halo saida ne’e atubele halo alarga kobertura RTTL. Tanba ita uza terresteriál no satelite ne’ebé ita agora konstrusaun torre lima, tolu ramata ona, enkuantu rua sei iha konstrusaun no hitu mak ita sei planu atu harii tan,” nia informa.
Jornalista : Natalino Costa
Editora : Julia Chatarina
