DILI, 19 Fevereiru 2026 (TATOLI)–Prezidente foun Rádiu Televizaun Timor-Leste, Empreza Públika (RTTL, E.P), Rosário da Graça Maia, kompromete sei aposta prioridade tolu hodi mellora no dezenvolve empreza estatál ne’e durante nia mandatu.
“Depois halo tiha avaliasaun preliminár ein termu diskusaun ho funsionáriu sira, ha’u identifika prioridade estratéjiku tolu ne’ebé sei guia ami-nia serbisu iha tinan sira oin mai, primeiru, Hametin Instituisaun, ho énfaze boot ba reforma legál no redefinisaun planu estratéjiku atu garante katak RTTL funsiona ho klaridade, independénsia, responsabilidade, no aliñamentu ho padraun nasionál no internasionál,” Rosário hato’o iha nia diskursu bainhira simu pose nu’udar Prezidente foun RTTL, E.P ba mandatu tinan-haat, ne’ebé hala’o iha edifísiu sentrál, Kaikoli, Kinta ne’e.
Prioridade daruak mak prioriza espansaun no reforma programasaun inklui preparasaun ba lansamentu kanál dois iha lian ingléz, portuguéz no lian seluk bainhira bele dedikadu atu promove narativa Timor-Leste.
“Ita-nia identidade, kultura, demokrasia no dezenvolvimentu ba ASEAN mundu tomak. Iha prosesu ida-ne’e ita kontinua konta ho apoiu husi Governu Austrália ho ABC International Development,” nia akresenta.
Prioridade datoluk mak atu modernizasaun infraestrutura liuhusi teknolojia no inovasaun atu halo RTTL sai mídia estatál ida-ne’ebé modernu, efisiente no kompetitivu, ne’ebé prontu hasoru dezafiu iha era dijitál. Aleinde ne’e, konta ho apoiu husi Governu Japaun no UNDP ba konstrusaun edifísiu foun RTTL.
“Prioridade sira ne’ebé ha’u temi ona, sei suli hamutuk ba objetivu boot liu mak atu halo RTTL sai modernu no kompetitivu iha tinan-lima oin mai. Ami sei la halo milagre, maibé objetivu boot ne’e ha’u fiar bele atinje liuhusi serbisu ekipa hamutuk funsionáriu 146-resin RTTL, E.P iha Dili no iha munisípiu sira. Sira mesak ema profisionál de’it ho dedikasaun, talentu no kompromisu boot. Buat ne’ebé sira presiza mak rekursu, fiar no oportunidade atu kontribui,” nia katak.
Notísia relevante : Prezidente RTTL, E.P foun prioriza fortalesimentu institusionál durante mandatu
Durante mandatu, Prezidente emposadu sei halo espansaun programasaun ne’e mós sei fó biban ba RTTL atu komunika di’ak liu impaktu dezenvolvimentu neʼebé IX Governu Konstitusionál hala’o daudaun no ida-ne’e sei garante ba futuru nune’e iha oportunidade hanesan ba instituisaun Estadu hotu, auto polítiku sira, sosiedade sivil no sidadaun hotu atu bele partisipa ativamente iha dezenvolvimentu nasionál.
Nia dehan, durante nia mandatu sei mellora RTTL liuhusi hametin nia papél hanesan mídia públiku konfiávél no verifikadór notísia iha konteksu kresimentu lalais liu mídia sosiál no intelijénsia artifisiál, ne’ebé sei hametin padraun editoriál, mekanizmu verifikasaun fanu, no literasia mídia atu kontra dezinformasaun, no garante katak públiku simu informasaun loos, verifikadu no kredível.
Rosário mós kompromete katak sei halo revizaun totál ba programasaun RTTL kanál um atu responde di’ak liu ba nesesidade audiénsia oinoin iha rai-laran, inklui estabelesimentu biro rejionál sira atu intensifika dizeminasaun informasaun di’ak liután husi munisípiu sira no iha aliñamentu permanente ho Governu nia planu desentralizasaun Governu.
Iha fatin henesan, Sekretáriu Estadu Komunikasaun Sosiál Expedito Dias Ximenes, hateten, IX Governu Konstitusionál enkoraja RTTL atu hametin kooperasaun iha rejionál, liliu iha ASEAN hodi aliña ho padraun internasionál hodi fasilita troka konteudu rendimentu ho administra polítika mídia.
“Kumpre ba mandatu Konstitusionál RTTL artigu 40 ne’ebé garante liberdade espresaun no garante liberdade imprensa iha artigu 41 proteje no asesu ba informasaun inklui dokumentu públiku no prisípiu transparánsia Governamentál,” nia katak.
Iha biban ne’e, Sekretáriu Estadu Komunikasaun Sosiál, Expedito Dias Ximenes, kongratula Prezidente foun RTTL, E.P Rosário Graca Maia.
“Parabéns ba maun Rosário, ba knaar foun no bom traballu,” nia kongratula.
Iha fatin hanesan, Vise Primeiru-Ministru, Ministru Koordenadór Asuntu Ekonomia no Ministru Turizmu no Ambiente, Francisco Kalbuadi Lay, iha nia diskursu husu ba Prezidente foun RTTL EP, Rosário Graca, atu hadi’a transmisaun.
“Ita tenke hadi’a buat sira hahú husi agora, ha’u prontu serbisu hamutuk ho imi, liuliu IX Governu. Apresia mós ita-boot sira-nia serbisu,” nia tenik.
Governante ne’e rekoñese, mídia nu’udar xave ida-ne’ebé mak kontribui boot tebes ba dezenvolvimentu nasionál.
“Ho vizita Ami Papa nian, imi kobertura di’ak tebes to’o iha mundu tomak ema hotu haree no mídia sosiál imi hotu hatene fatin ida monu de’it ema hotu hatene tiha ona ho nune’e sé dei’t ita tenke serbisu hamutuk. Dala barak katak kandang-kadang iha ne’e idaidak iha interrese, maibé ha’u husu ho haraik-an labele halo notísia-notísia sira ne’ebé ladún balansu no tendénsia,” nia enkoraja.
Vise Primeiru-Ministru depozita konfiansa absoluta ba Prezidente foun ho nia lideransa bele serbisu hamutuk ekipa bele dezenvolve instituisaun di’ak liután.
“Ha’u fiar katak ho lideransa foun señór Rosário Maia, ita-boot ho ekipa tomak iha ne’e, ita-boot sira hanesan supervizór ne’ebé serbisu ho ekipa ba lori nafatin ita-nia rai ba mundu,” nia fó hanoin.
Jornalista : Natalino Costa
Editora : Julia Chatarina
