DILI, 20 Fevereiru 2026 (TATOLI)—Komandu Pesoa Formasaun husi Polísia Nasionál Timor-Leste (PNTL) submete ona Ofisiál Superiór na’in-54 nia dokumentu ba Komisaun Promosaun Trazitóriu iha Ministériu Interiór (MI) atu halo promosaun.
“Ita foti ona sira-nia viza pesoál no sira-nia Kurríkulu Vitae (CV) hodi envia ona Gabinete Ministru Interiór nian tanba Komisaun Promosaun Trazitóriu prezide husi Xefe Gabinete Ministériu Interiór,” Komandante Komandu Pesoa Formasaun PNTL, Superintendente Xefe Polísia Arquimino Ramos, informa ba Ajénsia TATOLI iha ninia knaar fatin, Batallaun Orden Públiku (BOP), Kaikoli, Sesta ne’e.
Nia esplika, Governu sei halo promosaun trazitóriu ba membru PNTL Ofisiál Superiór, ne’ebé kompostu husi deviza Superintendente Asistente antiguidade sei promove ba deviza Superintende Polísia, husi deviza Superintendente Polísia ho antiguidade sei promove ba deviza Superintende Xefe Polísia no husi Postu Superintendente Xefe Polísia sei promove ba Komisáriu Asisténte ka fitun ida.
“Husi deviza Superintendente Asistente Polísia to’o Superintendente Xefe ho antiguidade ne’ebé atu promove ne’e iha 54 pesoas mak ita manda ona Gabinete Exelensia Ministru ninian,” nia akresenta.
Notísia relevante : Ministru Interiór prefere halo uluk promosaun diviza ba Ofisiál Superiór PNTL
Komandante Arquimino fundamenta, MI mak sei prepara modalidade promosaun no sei lori ba Konsellu Ministru atu hetan aprovasaun.
“Bainhira hetan ona aprovasaun iha ne’ebá, ami sei hetan fali orientasaun para ba promosaun,” nia katak.
Promosaun sei hala’o iha fulan ne’e ka fulan oin, tanba ne’e depende ba desizaun Konsellu Ministru, hafoin desizaun ne’e mak foin deside loron promosaun.
“Ami-nia Komandu Pesoa Formasaun nia kompeténsia mak prepara dadus sira, CV sira hetan no manda ona ba Gabinete Exelensia Ministru Interiór, liliu ba Xefe Gabinete hanesan Prezidente Komisaun Promosaun Trazitóriu,” nia katak.
Aleinde ne’e, husi Komandu Pesoa Formasaun mós aprezenta dadus lista ajente sira ba Sekretariadu Komisaun Promosaun Trazitóriu iha MI.
“Agora ita fahe ona formuláriu ba ajente sira no Komandu Pesoa Formasaun nia kompeténsia mak fornese de’it dadus viza pesoál nomós ho sira-nia avaliasaun dezempeñu sira, ita manda hotu ba Sekretariadu Promosaun Trazitóriu,” nia hato’o.
Jornalista : Natalino Costa
Editora : Julia Chatarina
