Eis Ministru Justisa xinés hetan kastigu perpétua tanba korrupsaun
DILI, 03 Fevereiru 2026 (TATOLI) – Tribunál Populár Intermédiu Xiamen nian iha leste Xina nian kondena ona Eis Ministru Justisa ida ba prizaun perpétua hafoin konsidera nia kulpadu tanba simu subornu sira ho totál kuaze dolar amerikanu millaun $20 durante dékada ida liubá.
Tang Yijun, ho tinan 64, hanesan ministru Justisa Xina nian hosi tinan 2020 to’o 2023 no okupa kargu oioin seluk durante nia karreira, inklui governadór hosi provínsia Liaoning no xefe hosi Partidu Komunista Xinés (PCC) ba sidade Ningbo.
Prezidente Xi Jinping hala’o ona purge (hamoos) anti-korrupsaun ne’ebé maka’as dezde nia tama iha podér iha tinan 2012, represaun ida ne’ebé maka krítiku sira hatete katak permite nia atu halakon rival polítiku potensiál sira.
Tang abuza “vantajen sira ne’ebé asosiadu ho kargu sira ne’ebé nia kaer tuituir malu” hodi “hetan benefísiu sira ba entidade oioin no indivídu sira” entre tinan 2006 no 2022, haktuir hosi Tribunál Populár Intermédiu Xiamen nian iha leste Xina nian liuhusi nota imprensa.
Hodi troka pagamentu, eis-funsionáriu ajuda ema sira no empreza sira ho oferta públika inisiál sira, asegura empréstimu bankáriu sira, hetan rai no asuntu sira seluk, hatete hosi tribunál.
Tang simu totál yuan millaun 137 (dolar amerikanu millaun $19,7), haktuir.
Montante “partikularmente aas” hosi subornu sira hamosu “estragu maka’as tebes ba interese sira Estadu nian no povu nian,” haktuir nota imprensa husi Tribunál Populár Intermédiu Xiamen.
Maibé, tribunál konsidera ona sirkunstánsia mitigante sira hanesan faktu katak Tang konfesa hafoin nia kaer, hatudu arrependimentu, rekoñese nia sala no koopera ho investigasaun.
Eis-ministru justisa xinés seluk, Fu Zhenghua, hetan kondenasaun ba korupsaun iha 2022. Nia simu sentensa mate ho adiamentu tinan rua, hafoin ne’e sentensa ne’e muda ba prizaun perpétua.
Autoridade sira fó-sai iha fulan liubá katak sira lansa investigasaun hasoru jenerál Xina nian ne’ebé maka’as liu, Zhang Youxia.
Nia maka figura militár ho pozisaun aas liu ne’ebé maka hetan monu iha dékada sira ikus ne’e.
Notísia relevante: Eis-ministru desportu Xina nian hetan kondenasaun ba mate tanba korrupsaun
Fonte: CNA (Chanel News Asia)
