Embaixadór Adão Barbosa asume kargu Prezidente LDCs 2026-2027
DILI, 03 Fevereiru 2026 (TATOLI)–Enviadu Espesiál Governu Timor-Leste Asuntu Klimátika, Embaixadór Adão Barbosa, tersa ne’e, ofisialmente asume kargu nu’udar Prezidente Grupu Nasaun Menus Dezenvolvidu (LDCs) ba períodu 2026-2027.
Pozisaun Prezidénsia Grupu Nasaun Menus Dezenvolvidu (LDCs) ne’e entrega husi Malawi ba Timor-Leste iha períodu 2026-2027. Timor-Leste asumi prezidénsia iha marjen COP30 nian iha Belém, Brazíl hafoin eleitu nu’udar xefe grupu nian.
Ministru Negósiu Estranjeiru no Kooperasaun, Bendito Freitas, hateten Timor-Leste asume papel prezidensial ne’e hanesan papel ida importante katak papel Timor-Leste nian iha multilateralizmu, iha asuntu globál liuliu kona-ba mudansa klimatika, finansiamentu globál, kona-ba dezafiu iha risku dezastre natuál nian.
“Timor-Leste sente hanesan orgullu maibé ho dezafiu boot ida mai ita katak ida-ne’e hanesan konfiansa globál mai ita Timor-Leste nia polítika, Timor-Leste nia partisipasaun iha forum multilaterál sira,” Ministru Bendito hateten ba jornalista sira iha edifisiu Ministériu Negósiu Estranjeiru no Kooperasaun (MNEK).
Bendito dehan, konfiansa ida-ne’e iha loos momentu ne’ebé Timor-Leste la’o ba hamutuk ho Asosisaun Nasaun Sudeste Aziátiku (ASEAN) iha mós asume funsaun hanesan pro temporáriu prezidénsia ba Nasaun sira Ko’alia Lian Portugés (CPLP, sigla portugés).
“Reprezentante Governu Malawi mai iha Timor-Leste ohin loron entrega prezidénsia ne’e, sira hatudu sira-nia solidariedade laiha konfiansa ba lideransa Timor-Leste nian liuliu depozita konfiansa iha Embaixadór Adão Barbosa ohin loron hala’o misaun ida-ne’e. Sei apoiu polítika iha inisiativa embaixadór Adão Barbosa nian liuliu serbisu sira-ne’ebé ligadu ba natureza, dezastre naturál, mudansa klimátika, polítika finansiamentu kona-ba asuntu barak ne’ebé sai hanesan dezafiu ida tanba mundu ohin loron komplexu liután. Iha nasaun poderozu balun hahú dada-an sai husi organizasaun importante sira hanesan iha Nasaun Unida,” Bendito dehan.
Iha fatin hanesan, Embaixadór Adão Barbosa hateten sente orgullu tanba hetan fiar husi Estadu membru PMD sira hodi asume kargu hanesan Prezidente.
“Timor-Leste orgullu tanba hetan fiar husi Estadu-membru PMD ne’ebé fó konfiansa boot ba Timor-Leste atu bele lidera grupu ida-ne’e hodi halo negosiasaun nivel internasionál iha mundu kona-ba bele refleta nesesidade área vulnerável sira-ne’ebé mak nasaun sira dezenvolvidu iha mundu atu hasoru,” Adão tenik.
Nia hatutan, saida mak Timor-Leste halo ba oin mak foti pozisaun husi nasaun LDCs sira-nian haree husi nasaun ida-idak nia vulnerabilidade ba xoke ekonómiku esternu, dezastre naturál no mudansa klimátika.
Tuir Embaixadór Adão, assume kargu ida-ne’e hanesan naha todan ida maibé nia fiar katak, serbisu ne’e sei lahalo mesak tanba sei hetan apoiu iha kolaborasaun husi Ministeriu Turizmu no Ambiente iha mós Ministériu Negosiu Estranjeiru no kooperasaun Timor-Leste.
Aleinde ne’e, sei hetan apoiu asisténsia iha fundu balun husi parseiru internasionál sira liuliu husi ánaliza Klimátika iha Institutu Internasionál ba dezenvolvimentu iha setór ambiente.
Iha fulan-Abríl, Timor-Leste organiza PMD (LDCs) Sesaun enkontru Estratéjiku iha Dili, iha fulan-Outubru, kaer LDC iha sesaun daruak molok partisipa iha Konferénsia Parte sira (COP31) iha Turkia iha diresaun hanesan.
Jornalista : Hortencio Sanchez
Editór Cancio Ximenes
