DILI, 03 Fevereiru 2026 (TATOLI)—Primeiru Ministru, Kay Rala Xanana Gusmao hamutuk ho Prezidente Korea International Cooperation Agency (KOICA) halo inaugurasaun ba kampu Sport Training Center ka Sentru Desportivu Amizade Korea no Timor-Leste iha Bekora.
Xefe Governu Timor-Leste hato’o agradesementu ba povu Korea liuliu ba KOICA ne’ebé ho apoiu solidáriu nian hatudu iha área barak tebes, tanba ne’e KOREA nia amizade no apoiu ba rai sira ne’ebé mak presiza liuliu Timor-Leste ne’ebé Korea tulun.
“Labarik mak futuru Timor-Leste nian tanba ne’e desportu la’ós de’it kompetisaun no desportu la’ós manán ka lakon, maibé ho sentru sira hanesan ne’e ita buka atu forma karáter labarik sira-nian atu sai sidadaun ne’ebé mak di’ak. Tanba, durante ne’e laiha atensaun ba desportu nu’udar área formasaun karáter ba labarik sira,” Primeiru Ministru, Kay Rala Xanana Gusmão, hateten bainhira ramata serimónia inagurasaun no asina plaka iha Kampu Becora,ohin.
Nia afirma, Governu hakarak loke desportu hodi bele haluha sira-nia hanoin no forma karáter atu bele hetan sosiedade ne’ebé iha dame nia laran.
Iha fatin hanesan, Prezidente KOICA, Chang Won Sam, espresa no hato’o agradesementu ba prezensa sira hotu iha serimónia inaugurasaun Sentru Desportivu Amizade Korea-Timor-Leste nian iha loron ohin.
“Ha’u mós hakarak hato’o agradese kle’an ba parte hotu ne’ebé serbisu maka’as hodi ezekuta projetu ida-ne’e. Ha’u-nia vizita mai Timor-Leste hanesan vizita Prezidente KOICA ba daruak iha tinan hitu nia laran, no ba ha’u pesoalmente, ida-ne’e hanesan vizita dahuluk. Bainhira to’o iha aeroportu, ha’u impresionadu ho Timor-Leste nia vida no enerjia ne’ebé forte, halo ha’u sente katak nasaun ne’e iha futuru ne’ebé naroman tebes,” Chang Won Sam hateten.
Na relata, depois estabelese iha 2010, KOICA serbisu hamutuk ona ho Timor-Leste ba dezenvolvimentu sustentável iha setór oioin hanesan saúde, dezenvolvimentu labarik no foinsa’e, formasaun vokasionál, agrikultura, mudansa klimátika no selu tan.
Entre projetu sira ne’e, Projetu Dezenvolvimentu Labarik liuhusi Desportu ne’ebé atu inaugura ohin, sai nu’udar projetu ne’ebe importante tebes ba dezenvolvimentu foinsa’e sira-nia saúde no sai mós hanesan projetu reprezentativu iha setór edukasaun nian ne’ebe Korea no Timor-Leste realiza hamutuk.
Timor-Leste maiória populasaun joven ho idade média tinan 21 no 50%-resin husi populasaun mak ho idade tinan 24 mai kraik. Ida-ne’e katak dezenvolve labarik no foinsa’e sira sei sai hanesan forsa ekonomia ba futuru Timor-Leste nian.
Tan ne’e, KOICA fó apoiu ba dezenvolvimentu ne’ebé foka ba labarik kiik-oan to’o foinsa’e sira. Sentru Desportivu Amizade Korea-Timor-Leste sai ezemplu dahuluk iha Timor-Leste hetan apoiu husi doadór ne’ebe harii kampu desportivu no fasilidade sira seluk ho padraun internasionál.
Fatin ida-ne’e kompletu ho kampu, aula futeból, bele simu labarik no foinsa’e hamutuk na’ in-1.000-resin iha tempu hanesan. Ida-ne’ e hatudu katak sentru ne’e sai ona fatin importante ba dezenvolvimentu komunitáriu ida ba ema hotu.
Aleinde ne’e, bazeia ba manuál projetu ne’ebé prepara ona, Ministériu Juventude, Desportu, Arte no Kultura (MJDAK) sei kontinua hala’o programa desportu ba dezenvolvimentu labarik sira-nian iha futuru. Ida-ne’e katak rezultadu ohin nian la’ós de’it ba tempu badak, maibé ida-ne’e rezultadu husi kooperasaun sustentável ne’ebé nasaun rua ne’e harii hamutuk.
“Ha’u hein katak iha futuru, sentru desportivu ida-ne’e bele sai nu’udar sentru ba dezenvolvimentu labarik no foinsa’e, no mós sai sentru ba desportu ba juventude nian hodi kontribui ba Timor-Leste nia futuru ne’ebé sustentável,” nia dehan.
Notísia Relevante:
Jornalista : Felicidade Ximenes
Editór : Cancio Ximenes
